الحقيقه المخفيه

اوقات بنكتشف فى اللى قدامنا جوانب فى شخصيته كانت مستخبيه وممكن تصدمنا فيه !

اوقات بنعرف حقايق مكنش المفروض نعرفها وبتتعبنا جدا !

اوقات الناس اللى كنا حاطينهم قدوه ومثل نعرف عنهم حاجات تخلينا نفقد مصداقيتهم جوانا !

ما نسميه "العثرات" ...

يا ترى فيه حاجه زى كده فى جسمنا ؟

ولا جسمنا عارف نفسه تمام المعرفه ؟!

هل هافاجاك لما اقلك ان ده بيحصل فعلا !

وان جسمنا ما يعرفش حاجات عن اعضاء معينه جواه !

وان فيه حواجز واسوار بتستخبى وراها اعضاء معينه علشان مينفعش تبان !

وان ظهورها ده بمثابه انتحار للعضو ده ووظيفته ...

الظاهره دى اسمها ال Immune Privilege يعنى الاعضاء دى بتتمتع بميزه القدره على الهروب من نظام المناعه !

والعلماء ارجعوا هذه الظاهره بسبب وجود حاجه اسمها Blood Tissue Barrier اى الحاجز بين الدم والانسجه

ويعتبر اقوى حاجز موجود هو حاجز الخصيه Blood Testis Barrier

وده اللى هنتكلم عنه النهارده ..

شروط نقل الاعضاء

اعتقد ان معظمنا مبيحبش يحس انه تقيل على حد
حتى فى مشاكلنا .. مبنحبش نعمل منها ازمه كبيره
حتى لما بتكون مشاكل كبيره .. ممكن نرفض حتى المساعده !

انا هبقى تمام .. انا مش محتاج لحد
محدش هيفهمنى او يستوعب احتياجاتى

انا حابب اتكلم النهارده عن عمليه ابتدينا نسمع عنها كتير فى زمننا ده
وهى نقل الاعضاء ..
اشهرها الكبد والكلى ولكن طبعا فيه القرنيه والقلب واعضاء اخرى بتتنقل ..

وعمليه نقل الاعضاء من انسان/متوفى الى مريض عمليه معقده للغايه
بتحتاج توافر شروط كتير ابسطها  توافق فصيله الدم ولكن مش ده بس
فيه اجسام مضاده كمان جوه الدم بنحتاج انها تكون متوافقه ..
فيه اشتراطات فى اللى هيتبرع وكمان توقيت وطريقه اخذ الاعضاء باحترافيه للحفاظ على حيويتها !
فيه اشتراطات فى المريض اللى هيتلقى العضو كصحته العامه وانه مش بيشرب خمور او عنده اسباب قد تؤدى الى تلف العضو مره اخرى

المرسال

مريت باوقات كتير كنت منتظر من الناس انها تفهمنى بس مبتفهمنيش

اوقات وحشه سابت جوايا انطباعات مش حقيقيه انى مش مرغوب ومش محبوب 

اوقات كنت بمسك الموبايل واقلب فى اسماء الناس

بسال نفسى مين دول ؟ وازاى بقينا بعاد عن بعض كده ؟

ازاى ممكن يعدى عليا وقت صعب وملاقيش حد الجأ اليه او اتكلم معاه

بصيت جوايا واخدت وقت هادى شويه

فافتكرت حقيقه طبيه فهمتنى قواعد كتير علشان مقعش فى المطب ده

احنا جسمنا فيه ملايين من الخلايا

الخلايا دى بتكون اعضاء 

وجسمنا فيه اعضاء كتير جدا

وظائف الاعضاء دى مبنيه على بعض

يعنى ايه الكلام ده

ناخد مثلا الكالسيوم

تبعات التجربه

مصطلح التعافى والتأهيل يمكن يكون عدى على بعضنا قبل كده
وده بنطلقه على الانسان اللى حصل تعب ما فى جسمه وابتدى يخف منه فدخل فى مرحله التعافى
ففى المرحله دى حده المرض بتقل وبنبتدى نتعامل مع تبعات الاصابه او المرض
فنحاول نرجع الدنيا زى ما كانت او اقرب ما يمكن من الطبيعى

هاخد مثل من واقع حياتى ومن اللى بشوفه فى شغلى كجراح عظام
بيجيلنا عيان باصابه فى الركبه .. كسر مثلا وما يصاحبه من تورم شديد واصابه فى العضلات والاربطه
وسواء عملنا علاج تحفظى فى صوره جبس او تدخل جراحى
وجدنا ان عيانين كتير بيحصلهم ضعف فى العضله الرباعيه

ملاحظه سماها العلماء "Arthrogenic Muscle Inhibition" واختصروها ل "AMI"
الظاهره دى لاحظها العلماء فى عيانين كتير زى :
* مرضى الخشونه المتقدمه
* بعد عمليات الرباط الصليبى
* بعد اصابات الكسور

النظام يفشل !

يمكن اكتر حاجه بيحاربها الانسان فى حياته هى ذاته ..

ادراكه انه كائن محدود .. 

محدود فى المعرفه والقدره !

وبالرغم من ان كتير ممكن يكون مقتنع بالكلام ده نطريا 

لكن فى الحياه اغلب سلوكنا بيترجم رغبتنا فى اننا نخرج عن حدود قدراتنا

والنتيجه اللى بنقابلها فى المستقبل القريب او البعيد هى الفشل 

فشل فى احتواء الرغبات ..

فشل فى السيطره على توابع السعى نحو الرغبات الغير محدوده ..

واللى بينتج عنه فشل فى النظام العام ..

للحياه عامه وللجسد زى ما هنوضح بعد شويه ..

الخيط المثلوث !

"كلما كنت بمفردك كلما ازدادت سرعه خطواتك .."

فكره انتشرت فى زماننا تدعو الى الفرديه
وهى مشكله تواجه ثقافتنا العربيه ..
اى عدم القدره على العمل وسط فريق ..
ويمكن منقدرش ننكر قوه عمل الفرد بمفرده بعيدا عن تشويش المجموعه باختلاف وجهات نظر افرادها
ومنقدرش ننكر ان الانجازات بتكون فعلا اسرع وبالطريقه المفضله لك عندما تعمل منفردا ..
ولكن ماذا عن العمل الجماعى ؟!

لا اعلم ولكنى معك

"فى ايه يا عم؟!  انا جيت جنبك !"

بنقول العباره دى كتير لما نلاقى حد متنرفز علينا من غير سبب واضح
اوقات مع صحابنا يكون الهزار العادى مصدر الم
واوقات كلام بسيط فى ساعه صفا يتعب اللى قدامك ..
كلامنا مفهوش غلط فى نظرنا ..
واحنا عارفين كويس اللى قدامنا وعمر ما الكلام ده ضايقه فى يوم
ولو جبنا حد يحكم ما بيننا هيقول لا الكلام متعب ولا فيه سبب يخلى اللى قدامنا يتعب منه !
بس هو اتدايق النهارده ..
بمكن بيتلكك .. يمكن مخبى حاجه .. يمكن بيستهبل !
مش عارف ..
عارف انه متالم بس مش عارف ليه وده بجد ولا استهبال
اللى قلته ده جزء من يومنا سواء فى صحوبيه او مع اهلك او شريك حياتك او حتى اولادك
ويمكن يكون فعلا تفسيره صعب بس تعالا اخدك معايا ليوم فى الاستقبال فى المستشفى
لانى بنفسي تلامست جدا مع الموضوع ده وحابب انقلك اللى اتعلمته ..

موضوع الالم ده موضوع معقد جدا وانا كطبيب فى الاستقبال بتلامس معاه ومع تعقيداته
فكره ان العيان اللى قدامك مش مجرد عضمه مكسوره !

لكن سبب الكسر سواء كان خناقه مع حد او تعرض لاعتداء او حادثه بيفرق جدا
وخصوصا لو كان اعتداء من حد قريب زى الاب او الزوج فى احيانا كثيره
فالكسر مش مجرد عضمه لكنه كسر فى النفس ..

صدمه .. مشاعر بتغلى من الالم ... قدره تحمل ضعيفه جدا ....
عدم استيعاب للموقف .. خوف من المكان ومن المحيطين ..

وسط كل ده بيجى دكتور لسه مخلص ازازه البيبسي وبيضحك مع صحابه علشان حد قاله فى حاله جات ..

خرسانه حيه

كمشروع دكتورعظام حابب اتكلم معاكوا النهارده عن حياتى المتمثله فى "العضمه"
عمرك فكرت فى تكوين العظام ؟
يفرق ايه عن عمود جبس او عن حتى شويه اسمنت !!
الحقيقيه ان فيه شبه كبير بين الاسمنت او الخرسانه اللى بتمثل اساسات المبانى وبين العظام
العظام هى الاساس اللى بتتفرش عليه العضلات واللى بيتكون بينها المفاصل ..
هى اللى بيمشى حواليها الاوعيه والاعصاب وهى اللى بتحوى الاعضاء المهمه
زى الرئه والقلب جوه القفص الصدرى (الضلوع)، والنخاع الشوكى جوه الفقرات فى الضهر
بس ياترى هل العضم مجرد كالسيوم وفيسفور وشويه معادن كده بتخليه صلب متماسك وخلاص ؟! ..
الحقيقيه لأ

فى اول دراستى للطب ، لفت انتباهى الموضوع ده جدا خصوصا لما اخدنا علم دراسه الانسجه Histology
فاكتشفت انه اه حقيقي نسبه كبيره من العظام بيشكلها الكالسيوم والفيسفور
لكن المفاجأه انه التكوين مش بس معادن لكن فيه خلايا حيه جوه العضم ..

مكنتش قادر استوعب الموضوع ده فى الاول لان منظر العضمه وهى ناشفه توحيلك انها زيها زى لوح جير او جبس ..

فازاى جوه الصلابه دى تختفى حياه ؟

والحياه دى ازاى بتستمر ؟!




بالدراسه فهمت ان التكوين الدقيق للعظمه واللى بيسموه ال "Haversian System" وده الوحده الاوليه للعضمه بيتكون من وعاء دموى (وريد وشريان) وحواليهم خلايا بتكون العضم ostoblasts وخلايا بتكسر العضم osteoclasts وحواليهم فيه الكالسيوم والفوسفات ومجموعه المعادن اللى بتدى للعضمه صلابتها

وبالرغم من ان الموضوع معقد شويه ومش مجاله هنا اشرحلك تفصيل تشريح العضمه ايه
لكن احب اشاركك باللى لفت انتباهى وانا بدرس الموضوع ده ..

الدلائل والعلامات "Signs"

احبائى
بالرغم من ان الصراحه حلوه
وان الكلام المباشر بيوصل هدفه بصوره اسرع واوضح ..
وبالرغم من الحياه مش محتاجه كلكعه
وكلنا بنحلم نعيشها .. "ببساطه"
لكن عمق الحياه ومعانيها بيفرض علينا واقع لا هو بسيط ولا سهل زى ما احنا بنتمنى ..

كلنا نفسنا نعيشها ببساطه وسهوله لكن ما بيحصلش،

حتى مع ربنا ..

اوقات كتير بنتلغبط فى سماع صوته
ونقول ياليته يكلمنا بطريقه مباشره وواضحه

ودايما السؤال المشهور

كيف اسمع صوت الله او كيف اعرف مشيئه الله

الم يكن الله بالاولى ان يكون صوته واضح وصريح بما لا يقبل الشك ؟ ..

تعالا نشوف لما ربنا صمم اجسادنا كان فكره ازاى ، 

ممكن وقتها نفهم جزء من طريقه عمل الله الطبيب الحقيقي معنا 

وازاى نقدر احنا كمان نتعامل مع بعض ..

سنه خامسه طب كانت اول سنه اكلينيكيه بالنسبه لنا كطلبه فى طب

و كانت اول مره نمسك فيها سماعه ونحس فيها بطن العيان ونكشف

اول مره نتعلم نسمع القلب والصدر

نتعلم فيها ازاى نقيس نبض العيان وضغطه ..

اعاده تصحيح المسار

يمكن يبان مصطلح سهل وظريف ومبهج
ويمكن يكون فى حاجات كتير فى الحياه سهل اننا نلاحظ اننا ماشيين فيها غلط ونرجع نظبط حياتنا على الصح
لكن فى جراحه العظام، الدنيا لا بالبساطه ولا السهوله دى
العظام هى عمود الخرسانه اللى بيتبنى على اساسه الانسان
هى اللى بيتفرش عليها العضلات والاعصاب والشرايين والاورده ويغلفهم الجلد
وهى اللى بيمشى فيها وزن الانسان وتساعده على الحركه واداء الوظائف الطبيعيه
ووجود تشوه بمسار العظمه بيأثر على كل حاجه
بيأثر على سلامه الطرف ومدى قدرته على انه يأدى وظيفته
وكمان بتسبب الام رهيبه تصل لدرجه الاعاقه فى الحركه

الكثير من التشوهات العظميه لا يمكن ملاحظتها وخصوصا فى بدايتها بالعين البسيطه
وتحتاج الى طبيب متخصص واوقات اشعه معينه وحساب لزوايا كثيره لتحديد اين تقع المشكله وما هو الحل المناسب لها

فبعض التشوهات لا يمكن ان ندرك وجودها لا نحن ولا المحيطين بنا ..
فنجتاز فى الام شديده وتعب وقله كفاءه ويلومنا من حولنا على تباطؤنا وقله كفائتنا فى فعل المطلوب

ولكن، عندما نخلع ملابسنا امام الطبيب المختص المدَرّب على التقاط التشوهات تنفتح اعيننا امام المشكله التى كانت تواجهنا طيله سنين ونحن غافلين عنها

الحقيقه اننا عندما نفهم ان جسدنا ليس طبيعيا بل مشوه ، نهدأ ..
فالالم الشديد الذى يعانى منه المريض وقله كفاءته يضاعفه عدم معرفه السبب
اما فى معرفه السبب اى التشوه يهدأ المريض لانه متى علم السبب فالخطوه التاليه هى العلاج

ان لوم الانسان لنفسه ولوم المحيطين له على اسباب لم تكن يوما فى يده متعب جدا ومرهق للنفس المريضه
لان جهل الانسان بنفسه وكذلك المحيطين به بمرضه انما يؤذى الانسان
لان الجميع يطلب منه ما يعجز بالحقيقه عنه
وربما لو كان لدى الانسان معرفه الطبيب لفهم مرض جسده ولسعى نحو العلاج لا الضغط اكثر على النفس المريضه

والتشوهات  ليست فقط جسديه او عظميه
فالتشوه النفسي اكثر الما وازعاجا
الذى يتمثل فى المعتقدات الراسخه منذ الطفوله التى تأسست عليها نظره الانسان لنفسه والمجتمع المحيط به فتصبح عظما لنفسه
وهذا التشوه يحتاج الى طبيب متخصص مثلما يحتاج مريض التشوه العظمى لطبيب متخصص

الخساره المحييه Safety Margins

مين فينا بيحب الخساره ؟
معتقدش ،،
وحتى لما الحياه بتفرض علينا خساره ، بنحاول نجتهد اننا نقللها على قد ما نقدر 

الخساره مش بس فلوس .. 

الخساره خساره فرحه ، انبساط ، متعه ، لذه
الخساره خساره عمر ، خساره اصدقاء ، خساره اوساط اجتماعيه
الخساره خساره "حاله"،، حاله تهييس ، حاله امان، حاله نشوه
الخساره خساره مشاعر اعطيتها ،، او مشاعر مش هتعرف تاخدها تانى 

احنا كأطباء وجراحين على فكره مابنحبش بردوا "الخساره"
يهمنا جدا انك تخف باقل خسائر ممكنه ..
بس الطب اوقات بيفرض علينا اننا نقبل خساره زياده فى سبيل انك تعيش اكتر ..
خساره فيها حياه !!!

ارتبط فكرنا ان الخساره دائما وحشه

لكن الطب ورانا ان فى خساره ممكن تكون هى السبب فى نجاتنا وحياتنا 

خساره هتخلينا نعيش افضل ،، 

مده اطول و نوعيه حياه اعلى

كل ده من خساره !

ايوه ..

مصطلح The Safety Margins

اى " الحــــــدود الآمنــــه"

Be Yourself ( متكونش إلا نفسك )

* هذا المقال اهداء إلى صديقىَّ العزيزين انطونيوس و ايلاريا بمناسبه خطوبتهما ،الرب يبارك حياتكما ويتمم ارتباطكما بزواج مبارك وحياه سعيده للمنتهى 

المقربين لى يعلمون ان كل ما اكتبه هنا هو نتاج دروس حياتيه
اعتقد ان الدرس ده من اهم الدروس فى حياتى
وكان لبعض اصدقائى دور عظيم فى توضيح المفاهيم دى جوايا
اتمنى انكم تخرجوا بفايده من قرايته
--------------------------------------

الخلايا فى اجسامنا مختلفه !
كل نوع ليه وظيفه معينه ليها معنى وقيمه فى مكانها فى العضو الصحيح
وكون الخلايا مختلفه لكن الاختلاف ده مش معناه ان فيه خلايا احسن من خلايا 
لكن الكل بيؤدى وظيفته فى العضو اللى موجود فيه
والنتيجه الهارمونى اللى بيحصل فينا كجسد واحد ..

كل خليه ربنا اداها مواهب معينه وقدرات معينه علشان تعرف تأدى وظيفتها صح

فمثلا ، خلايا المعده من وظايفها انها تفرز سائل فيه حمض قوى Hcl علشان يهضم الاكل و يٌفَّعل الانزيمات بتاعت الهضم
طيب الحمض ده مش ممكن يدمر الخلايا نفسها ؟

طبعا .. وعلشان كده ربنا خلق جوه الخلايا دى طريقه فريده لحمايتها من السائل الحمضى والانزيمات اللى بتاكل الاكل

المميزات دى مش موجوده فى باقى خلايا الجسم لانها ببساطه مش محتاجاها ، ومش من وظيفتها اصلا ..

طيب يحصل ايه لو الحمض ده بدل ما يمشى فى مساره الطبيعى
جوه المعده ، طلع فوق ..

The Lethal Triad (مثلث الموت)

* أتوجه بهذا الموضوع للمشيرين وكل من لهم فى الرعايه  وأبداء النصائح من اباء وامهات واصدقاء

شخصيه الجراح غالبا بتميل الى "الحلول النهائيه" ..
فى مشكله ، بنشمر دراعتنا وهات المشرط ..
افتح وصلح
وانتهينا !

اوقات كتير بيكون ده فى مصلحه المريض اننا نحل مشكلته بسرعه ونخلصه من الوجع اللى فيه ...

ولكن فى بعض الحالات الاندفاع لحل المشكله قد يؤدى الى موت المريض

وده اللى هتكلم عنه النهارده

فما هو مثلث الموت ؟!
بيسموه فى لغه الطب فعلا مثلث الموت "The Lethal Triad"

التوقيتات

فى شغلنا كجراحين عظام موضوع التوقيتات دة بيضايقنا قوى
خصوصا الجراحين الشباب اللى زى حالاتى كده
اوقات كمان بتوصل انه بيضايق المريض واهل المريض
الجراح عاوز يشتغل
والمريض عاوز يخف ويمشي

كل تاخير فى العمليه مزعج ..

امال مين العائق ؟

شبعان ؟

شبعان ؟
اكيد مش قصدى الاكل ولو ان الاكل مهم بردك
بس بجد شبعان ؟
ولا لسه محتاج ؟
شبعان حب .. اهتمام .. رعايه .. قبول !
ولا لسه بتدور لمعنى لنفسك وسط الناس ..
لسه بتشحت ومش لاقى حد يشبعك كلك ولا حتى يفهم احتياجاتك ..

عمال لامؤاخذه بترمرم ؟
شله، خروجات، مشغوليه، تلاهى، شهوه بطن، شهوه جسد، علاقات كتير، أدمانات مختلفه
وبعد كل ده تصرخ ..
لسه جعان !
كل ما تقعد مع نفسك متطيقهاش وتهرب منها ومن احتياجاتها ...

انا عاوز اتكلم معاك النهارده عن الشبع ..
على مستوى الخلايا الاول وبعد كده نحاول نشوف نقدر نتعلم منه ايه

الخلايا بتتواصل مع بعض عن طريق مواد كميائيه بتتفرز وتمسك فى مستقبلات على سطح الخلايا التانيه فتنقل ليها رساله معينه او تخليها تعمل عمل معين خاص بالماده دى ..

صوره دم كامله

صوره الدم الكامله من ابسط التحاليل اللى بتطلب من المريض
وببساطه هى بتقيس عدد خلايا موجوده فى الدم زى كرات الدم الحمراء
وكرات الدم البيضاء بانواعها والصفائح الدمويه
ونتائجها عباره عن ارقام زى ما انت شايف كده ..

ويظن الكثيرين ان الطبيب يبحث عن عدد الخلايا الناقص
وكعادتنا كمصريين لو لقينا خلايا عددها زائد ده معناه صحه ومناعه
حد يلاقى زياده ومينبسطش يا جدع !

لكن الحقيقه مش كده ..

الادمان السلوكى

انتشر فى الاونه الاخيره مفهوم جديد عن الادمان حابب اتناقش معاكم فيه
وهنلاحظ ازاى ان الادمان ممكن يكون قريب مننا فعلا
وانه مش مقتصر على ادمان المواد المخدره
وكمان هنعرف مبادىء جديده فى الادمان ممكن تكون مفاجاه لكثيرين
المبادىء دى هتغير طريقه نظرتنا للادمان وكمان هتوعينا على اساسيات فى التعاملات اليوميه
بس خليك معايا علشان الموضوع طويل حبه

الادمان كان لسنين طويله مقتصر على تناول المواد المخدره Substance Abuse
والمواد دى بتاثر على الجسم عن طريق المواد الكيمائية اللى فيها Physical وكمان بالتعود عليها Psychological

ولكن فى السنين الاخيره توسع مفهوم الادمان ليشمل السلوك

المفاجاه بقى ان الادمان السلوكى بيتعامل نفس معامله ادمان المواد المخدره بالظبط

التعافى ( 1 )

"الموضوع ده مش سهل عليا انى اتكلم فيه والكلام فيه مايجيش حاجه جنب الاحساس بيه والعيشه فيه ،، علشان كده مش هتلاقينى بتكلم كتير .. انت هتفهم من وسط الكلام كل اللى عاوز اقوله ومش قادر اعبر عنه .."

...
الحياه مليانه وجع والم ،،
فراق .. خيانه .. اساءات ..
فشل ..
ودايما فى الاوقات دى بنسأل نفسنا سؤال
ياترى ممكن نرجع تانى زى زمان ؟
ياترى هنخف ؟
ولا هيفضل الوجع موجود دايما جوه القلب ؟
 فعلا الوقت بينسينا ولا دى كذبه ؟

فى الكام موضوع الجايين هنتكلم عن التعافى فى جسد الانسان ،،يمكن يقدر يدينا فكره عن تعافى النفس البشريه ..

يعتمد تعافى الجروح فى جسم الانسان على ثلاث عوامل مهمه
1- عمق الجرح
2- نظافه الجرح
3- التغذيه

فالجروح التى لا يزيد عمقها عن 0.5 سم تلتأم بسهوله جدا ولا تترك اى اثر نهائي ومش محتاجه خياطه ..

عش نظيفا

 

اوقات تفرض علينا الحياه وقوانين المجتمع الموجودين به اننا نكون موجودين فى اوساط احنا مش راضين عن اللى فيها ..
طبعا بتختلف من وسط لوسط وكمان حسب المكان اللى اتربينا فيه وعشنا فيه معظم عمرنا
من شتايم بقى وكلام مش كويس وايحاءات وفساد وكذب واخلاق ضايعه ورشاوى ووسايط ..

فى مواجهه الحياه الحقيقه يقف امثالى ذو الخبرات القليله مصدومين من حقيقه واقع المجتمع
ويبقى السؤال ..
انا هعمل زيهم ولا هفضل زى ما انا .. "نضيف"

ولو عاوز افضل نظيف ازاى ؟ و اضمن من فين ان اللى حواليا مش هيغيروا فيا ولو بالتدريج وانا مش حاسس ..
ولا هبقى عامل زى طماطمايه نضيفه وسط قفص فاسد فمكتوب عليها تفسد...

فكره الوسط المحيط دى موجوده بردوا فى اجسامنا
تعالوا ناخد فكره يمكن تساعدنا نتعلم ولو مبدأ واحد عن مقاومه الوسط المحيط ..

الخلايا اللى فى جسمنا كل واحده بيحوطها غلاف اسمه "Cell Membrane"
الغلاف ده هو اللى من خلاله بتدخل وتخرج الغذاء من بروتين واملاح وايونات وجلوكوز الخ

ومالوا

يا عم "متحبكهاش"
"فكها شويه"
ومالو يا اخى !
ما تجرب ..
مش يمكن تعجبك ؟!
مهو ياما ناس عملت كذا وحصلهمش حاجه
لسه مصدق انه غلط !
"فكك" ما كله بيعمل كده

كلمات كثيره على هذا المنوال بيزن بيها الشيطان واصدقاء السوء -المضحوكين عليهم- علشان تتنازل مره عن قيمه او مبدأ واخده فى حياتك ..
بيتفلسفوا فى المبادىء ويحللوا الخطأ بافكار غريبه ..
ونحن نعيش فى مجتمع تتزايد فيه دعوات التحرر وتجربه الجديد بدون وعى
نتعرض لخطر شديد يسمى "التهاون" او "الاستهانه"

نفس الفكره بتحصل فى جسدنا فى مواجهه الامراض

عزيزى
ان خطوره بعض الامراض تكمن فى خمونها لفتره
بيسموها اهل الطب "The Incubation Period"
وهى الفتره التى تفصل بين الاصابه بالعدوى وبين ظهور اعراض المرض

يعنى مثلا فيروس الانفلونزا بياخد من يوم الى ثلاث ايام علشان تبان اعراض الانفلونزا على المريض
اما الجديرى فبياخد من 14-16 يوم علشان تظهر اعراضه

المصيبه بقى ان فى بعض الامراض ممكن يفضل الفيروس خامن لسنين وبعدين ينشط

حساسيه العقول

عارفين
ناس بتشتكى من صغرها ان لها حساسيه معينه
زى مثلا عينيها بتحمر قوى وقت الربيع (حساسيه الربيع)
او لما ياكل موز جسمه كله تطلع فيه بقع حمراء ويهرش جامد (حساسه لاكل معين)
او عنده ازمه صدريه وكل ما يشم روائح معينه يتخنق جدا وميقدرش ياخد نفسه
او حد عنده حساسيه للذهب فميقدرش يلبس اى حاجه فيها دهب

نفس الحساسيه اللى ممكن يكون بعضنا عنده نوع منها او يعرف حد عنده

الحساسيه دى موجوده عند معظمنا

بس فى عقولنا ......

فى مواقف معينه فى حياتنا مش بنعرف نعديها بسهوله ..
لو حد قالى كلمه معينه بفهمها بطريقه تانيه
لو حد عمل موقف بترجمه انا بطريقتى لحاجه مختلفه خالص

واحد من ملايين

كم مره نظرت الى نفسك انك ولا حاجه
واحد من ملاين عايش .. بلا هدف او معنى !
كم مره استهنت بكلمات مثل  "انت تقدر"  او  "انت عظيم"
كم مره تلذذت ان تنظر لذاتك بالعدسه المصغره واعتقدت ان الله ينظر لك ايضا بنفس الطريقه !
كم مره بررت لنفسك فشلك باعتقادك ان الحقيقه هى انك صغير عاجز بلا قيمه !
كم مره كررت كلمات مثل "انا فاشل"  او  "مفيش فايده"
و لا مؤاخذه يعنى "ديل الكلب عمره ما يتعدل " !

عزيزى ..
هنتكلم النهارده عن خليه فى جسم الانسان ..
انها لا ترى بالعين المجرده اذ ان طولها الحقيقى يساوى 0.002 انش او 50 ميكرومتر (الميكرو = 1/1000000  اى  10^-6 متر )
خليه قد حرمت من نصف الحمض النووى DNA  الخاص بها ولم يتبقى داخلها الا شريط واحد من الحمض النووى.
خليه تُنتَج ضمن ملايين الخلايا من امثالها وتوضَع فى المنافسه معهم ..
خليه تذهب فى غربه بعيده عن موطنها ودائره الراحه الخاصه بها الى مكان غريب لم تعتاده من قبل ..
خليه تواجه ظروف قاسيه جدا فى هذا المكان الغريب من اختلاف الوسط المعتاد بالنسبه لها الى احتمالات كثيره لتواهانها او وجود اجسام مضاده تحاربها !
خليه معرضه للموت والفشل !
خليه لو نظرت لها -اعنى لو قدرت ان تنظر لها من خلال الميكرسكوب - ستحتقر منظرها !

ميكروب فى العمليه

ازيكوا .. وحشتونى قوى

التعقيم مهم جدا فى العمليات الجراحيه وبنهتم بيه قوى فى عمليات العظام
لو حضرتوا اى عمليه جراحيه هتلاقوا فى تعليمات صارمه جدا من مكافحه العدوى بتتطبق !
من تعقيم الالات الى تعقيم المريض نفسه والطبيب
واتباع الجراحين لقواعد مكافحه العدوى اثناء تجهيز المريض للعمليه واثناء العمليه ذاتها متضمنا بذلك كل حركه تحدث داخل غرفه العمليات ..

تأتى صرامه القواعد من ان عدم اتباعها يؤدى الى كوارث قد تكون اكبر من تلك التى يدخل بسببها المريض المستشفى
من حدوث تسمم فى الدم والهبوط الحاد اثر ذلك او عدوى الجرح ذاته ورفضه ان يلتأم الى فشل العمليه ذاتها ..

علشان كده اول حاجه بنتعلمها كجراحين  هو التعقيم ...

وبالرغم من اتباع القواعد الصارمه لازالت تحدث بعض الحالات من العدوى
يتدخل فى هذا حاله المريض نفسه وخصوصا اذا كان مريض مصاب السكر او مهمل فى نظافته الشخصيه ..

بتوصل لدرجه ان العمليه تكون كويسه جدا ولكن لان المريض  مش مظبط ادويته و علاجاته او التغير على الجرح مش بيكون بنظافه تحدث العدوى ....

العدوى هى ميكروب يدخل فى غفله عنك

جنون المتعه

بالرغم من انى طبيب لكن قلبى بيتقبض لما اسمع كلمه "المرض الوحش"
وببقى على العكس تماما فرحان جدا وانا ببلغ مريض او اهله ان العينه اللى اتاخدت من الورم طلعت ورم حميد

وبالرغم من ان الناس اصبحت مهوسه بالمرض الوحش الا ان المعظم معندهوش فكره عن طبيعته او سبب حدوثه
الكل يترعب لو وجد " كولكيعه " فى جسمه اى ان كان مكانه
واول حاجه بتيجى فى دماعنا هى  انه ورم وحش ..
لكن ايه هو المرض ده ؟

عموما ..

المرض ده وصفه فى كلمه واحده إلا وهى "غير منضبط" Uncontrolled

بمعنى عدم انضباط نمو الخلايا وعدم انضباط سرعه تكاثرها وتجديدها وعدم انضباط سلوكها

الحكايه ببساطه عدم انضباط

اسباب عدم الانضباط كتيره .. اسباب داخليه معظمها و احيانا اسباب خارجيه

الرقص على الحبال !

يمكن من اصعب الحاجات اللى بتقابل ناس كتير فى حياتنا و واحده من اهم تحديات النضوج هى الاتزان !
ازاى تكون متزن جسديا .. لا مهمل فى صحتك وشكلك ونظافتك الشخصيه
ولا فى نفس الوقت بتبالغ فى اهتمامك بيه او تدليلك ليه
اتزانك النفسي وازاى توزن المعادله الصعبه بين ذاتك والاخر والله
ازاى لا تتكل على ذاتك فتنسى انك تراب او تتواكل على الله وتنسى دورك او تتكل على الاخر وتصير انسانا اعتماديا بصوره مرضيه وتحاول فرض سيطرتك على المقربين لك لانهم سر سلامك النفسى ..
ازاى تكون متزن روحيا لا عايش فى صومعه لوحدك متخيلا الله بحسب وجهه نظرك انت وبحسب احتياجاتك وعايش مقيد الله فى الصوره الذهنيه التى وضعتها انت -الانسان- لله، سواء كانت صوره خاطئه ام صحيحه حتى !
ولا من الناحيه التانيه تعيش متجاهل لدور الله فى حياتك وتنسى محدوديتك ..

فكره الاتزان دى مهمه جدا واحتياجنا ليها مش نابع من النهارده ..
فى الحقيقه احتياجنا للاتزان بيبتدى من اول يوم نتولد فيه !

فى ثلاثه امراض شهيره جدا فى تغذيه الطفل الرضيع

فلسفه الالم

من مهام طبيب الامتياز فى مستشفيات الجامعه هى سحب عينات الدم و بطبيعه طبيب الامتياز فهو يتعامل مع مستويات مختلفه من المرضى .. اطفال و كبار ..  رجال و سيدات .. متعلمين و اممين ..  من يستطيع استيعاب ما يحدث فى المستشفى ومن هو بلا وعى او ادراك ..
فكره سحب العينات بالرغم من انها بسيطه قوى الا ان اختلاف ردود افعال الناس وانا بسحب العينات خلانى اتأمل فى حاجات كتير اكبر من مجرد شكه ابره وسحب عينه ..

خد عندك مثلا فى مستشفى الاطفال مهما تحاول تفهم الطفل انها مجرد شكه ابره والم بسيط خالص الا انه مش بيقدر يفهم او يستوعب كلامى .. مجرد رؤيته لسن الابره يفزعه و على طول يشتغل عياط وصراخ املاً فى ان صراخه ينجيه من هذا الكابوس اللى اسمه الحقنه وعمرك ما تعرف تسحب منه العينه غير لما حد يكتفه وحد يبعد وشه عن مكان الشكه علشان ميشوفش اللى بيحصل ..

فى مستشفى الباطنه الموضوع مختلف تماما ..

Be your own flame

Translated By : Dr. Shaymaa El Araby

Published Originally Oct.,2,2012

How many times did you think that you need some encouragement… waiting for your friends to ask about you?

When you’re feeling down, you need someone to ask about you, someone to encourage you, someone to fill your days

Let me take you underneath, deeper, a little bit deeper to where your heart lies.

Your heart is one of a very few muscles in your body with a quality that is non existent in most of your body muscles, in medicine it’s called ‘the pace maker potential’

This quality is found in a very small portion of heart muscle, not even in the whole heart, it’s found in the right atrium and the wall separating the two atria.

This SA node is what starts all the heart working action.

So what does pacemaker potential mean? And why did God specified this very small part of the heart with this quality and not the entire heart?

Can you see the meaning that this part is self activating ‘self depolarization’?

دايما Up-Regulated !

مسألتش نفسك فى مره ليه فى اوقات بيبقى عندك شوق قوى لربنا وانك تسمع صوته

 اوقات من ابسط مواقف فى الحياه تحس من جواك انها رساله ربنا ليك

واوقات تانيه مهما تقرا فى كلام ربنا او تصلى مبتحسش باى حاجه

 اوقات تبقى نفسك تقضى الليل كله صلاه وكلام مع ربنا واوقات تانيه بتكروت الصلاه فى  خمس دقايق وتطلع منها زى ما دخلت ..

فى حاجه زى كده بالظبط بتحصل جوه جسمنا

 تعالا نفهمها سوا علشان نعرف نعالج المشكله دى ازاى ..

انت عارف ان المخ علشان يخليك تعمل حركه معينه بيتطلب انه يبعت اوامر بالحركه لعضلات معينه ..
الاوامر دى بتتنقل عن طريق اشارات كهربائيه من خلال الاعصاب لغايه ما بتوصل للعضله اللى مطلوب انها تشتغل
والمنطقه اللى بيتلاقى فيها العصب مع العضله نفسها اسمها Neuro-Muscular Junction ومن معنى الكلام يعنى الوصله junction اللى بتربط العصب neuro مع العضله Muscular

كلَّ حين

الصلاه ايه بالنسبه لك ؟
ممارسه روحيه علشان تقرب من خلالها لربنا ؟ هل هى روتين اعتدنا عليه ؟ هل هى صله حقيقيه بتربطك بالسما ؟
طيب ايه اللى يحصل لو مصلتش يوم ؟ آخررها ايه يعنى ؟!ايه اللى هيحصل لو كسلت النهارده ؟!
ما هو الصلاه موجوده عادى يعنى و احنا نقدر نقف قدام ربنا ونصلى فى اى وقت ..
طيب ايه اللى هيحصل لما يعدى علىّ اكتر من يوم وانا مش بصلى !
وليه كام يوم يا عم قول كام شهر ولا كام سنه وانا بعيد عن ربنا و عن الصلاه ؟
هيا الصلاه ايه بالنسبه لك ؟!

تعال نشوف ..

من المعلومات الجميله جدا عن تغذيه الطفل وهو فى بطن مامته هو التنفس
كل انسجه الطفل بتكون محتاجه تاخد اوكسجين و محتاجه انها تَخرَّج ثانى اكسيد الكربون وبعض المواد الناتجه عن التمثيل الغذائى
ولأن الطفل فى بطن مامته مش مُتاح ليه انه يستخدم رئته فبياخد احتياجاته من الغذاء والاكسجين عن طريق دم الام من خلال المشيمهPlacenta و الحبل السُرّى Umbilical Cord