الثغره

يمكن فى يوم تسأل نفسك .. انا ازاى وصلت لكده ؟ معقوله كل ده حصل لى ؟ تغيرات فى شخصيتى .. طريقه كلامى .. الفاظى حتى مبادىء .. ازاى و امتى كل ده حصل ؟!
من اكتر الخدع الى بتغير فينا هى التغير المتدرج باستخدام ثغره قد لا تراها العين المجرده والانسان مش واعى للتغير ده..
تعال نشوف الكلام ده بيحصل ازاى فى جسم الانسان ..

مرض فقر الدم ( الانيميا ) من الامراض المشهوره واللى ليها اسباب كتيره جدا..
احيانا بيجى ناس بتشتكى من اعراض الانيميا ذى عدم التركيز و شحوب الوجه والارهاق المستمر ومع استمرار المرض فتره طويله بدون علاج ممكن يعمل مضاعفات تأثر على القلب وتعمل Anemic Heart Failure


ويجى الدكتور يدور بقى بالفحوصات والتحاليل  علشان يعرف سبب الانيميا فيحدد طريقه العلاج
وبعد مشوار طويل واستبعاد امراض متنوعه شهيره تتطلع فى الاخر الليله ايه ..

حته دوده دخلت جسم الانسان من اكل مش نضيف مثلا وفضلت عايشه جوه الامعاء ماسكه فى جدارها وبتعض وتتغذى على دم الانسان


والمريض ولا هو هنا ... مش داريان باللى بينهش فى جسمه ويمص دمه..
عايش حياته بالطول والعرض .. وهو فى الواقع بينزف وبيخسر دم
لغايه لما الموضوع يسوء اكتر واكتر ووقتها بقى يبتدى يشتكى من اعراض الانيميا او مضاعفتها




سامحنى على الصوره دى بس دى صوره حقيقيه لديدان الاسكارس Ascaris Lumbricus موجوده باعداد مهوله جوه امعاء مريض .. انا حبيت بس اوضحلك بشاعه وخطوره الموضوع ..




خد بالك بقى يا صاحبى لأن حته دوده ممكن تجبلك ازمه قلبيه !
الناس عاده بتهتم بانها تتجنب الاخطاء الكبيره .. اما الحاجات البسيطه فيا عم عدى ومتدقش على الواحده ..
لأ، خد بالك لأن ثعالب صغيره ممكن تدخل من ثغره بسيطه فى السور جوه الكرمه و تدمرها وانت مشغول بتحرس الكرمه من الذئاب الكبيره..

اذا لقيت تصرفاتك طريقه كلامك او تفكيرك اتغيرت .. ارجع واقعد مع نفسك
راجع نفسك .. لتكون فى ثغره وانت مش واخد بالك منها
او دوده دخلت عن غفله و ساكنه جواك و انت مش حاسس بيها

متستهونش ولا تقلل من الاخطاء الصغيره وان كانت فى نظرك صغير فقد تكون هى الثفره !

معلومات طبيه اكتر هتلاقيها هنا :

http://www.ncbi.nlm.nih.gov/pubmed/2332643

http://parasitology.com/worms/index.html

http://en.wikipedia.org/wiki/Hookworm