وده بنطلقه على الانسان اللى حصل تعب ما فى جسمه وابتدى يخف منه فدخل فى مرحله التعافى
ففى المرحله دى حده المرض بتقل وبنبتدى نتعامل مع تبعات الاصابه او المرض
فنحاول نرجع الدنيا زى ما كانت او اقرب ما يمكن من الطبيعى
هاخد مثل من واقع حياتى ومن اللى بشوفه فى شغلى كجراح عظام
بيجيلنا عيان باصابه فى الركبه .. كسر مثلا وما يصاحبه من تورم شديد واصابه فى العضلات والاربطه
وسواء عملنا علاج تحفظى فى صوره جبس او تدخل جراحى
وجدنا ان عيانين كتير بيحصلهم ضعف فى العضله الرباعيه
الظاهره دى لاحظها العلماء فى عيانين كتير زى :
* مرضى الخشونه المتقدمه
* بعد عمليات الرباط الصليبى
* بعد اصابات الكسور
وده مكنش مفهوم قوى ..
ليه ممكن حاجه قويه ومتصابتش بالدرجه اللى تخليها تضعف جدا يحصلها كده !
وبالرغم من ان هذه الظاهره "AMI" بتوصل لحد معين وتقل بعده لكن مع مرضى كتير بتسيب اثر لو معالجناش الموضوع ..
بمعنى ان العضله الرباعيه ما بترجعش لكفائتها الكامله وده بيعرض المريض لعدم استقرار فى المفصل وبالتالى تزداد عرضته للاصابه مره اخرى ..
فاشتغلوا على نوعيات علاج طبيعى متعدده علشان يعكسوا اثر الالتهابات والتورم الخ
اذا كان جسمنا الطبيعى لما بيتعرض لاصابه بيحصل ضعف فى العضلات حتى لو هي قويه
فبالاولى الانسان المتالم من تجربه معرض ان تهتز جواه مفاهيم ثابته وقويه
الانسان المُجرَب ممكن يخرج من التجربه باثار تدوم طول حياته ..
مش كل الناس -حتى لو قويه روحيا- بتتعافى بنسبه كامله ..
فمهم انى افهم ده .. علشانى وعلشان غيرى !
محتاج تفهم ان التعافى مش حاجه سهله وسريعه ..
وانك قبل الاصابه حاجه وبعدها حاجه تانى ..
متقلش انا قوى وجامد وهى ازمه وتعدى لان الموضوع مش بس الازمه لكن تبعاتها ونتايجها ..
واذا فحصت نفسك وعرفت اللى حصلك بالتدقيق فكن متفهما لضعف بشريتك
اشتغل على نفسك وما وجدته من اثار
بالمجهود والتعب والصبر وطول البال هتلاقى كل حاجه بترجع بالتدريج لاساسها واحسن !
كن معافى !
للمزيد من المعلومات حول ظاهره ال "AMI" ممكن تقرا :
1- https://exrx.net/ExInfo/AMI
2- https://www.ncbi.nlm.nih.gov/pubmed/19954822
3- https://www.ncbi.nlm.nih.gov/pmc/articles/PMC4271337/
