يمكن من اصعب الحاجات اللى بتقابل ناس كتير فى حياتنا و واحده من اهم تحديات النضوج هى الاتزان !
ازاى تكون متزن جسديا .. لا مهمل فى صحتك وشكلك ونظافتك الشخصيه
ولا فى نفس الوقت بتبالغ فى اهتمامك بيه او تدليلك ليه
اتزانك النفسي وازاى توزن المعادله الصعبه بين ذاتك والاخر والله
ازاى لا تتكل على ذاتك فتنسى انك تراب او تتواكل على الله وتنسى دورك او تتكل على الاخر وتصير انسانا اعتماديا بصوره مرضيه وتحاول فرض سيطرتك على المقربين لك لانهم سر سلامك النفسى ..
ازاى تكون متزن روحيا لا عايش فى صومعه لوحدك متخيلا الله بحسب وجهه نظرك انت وبحسب احتياجاتك وعايش مقيد الله فى الصوره الذهنيه التى وضعتها انت -الانسان- لله، سواء كانت صوره خاطئه ام صحيحه حتى !
ولا من الناحيه التانيه تعيش متجاهل لدور الله فى حياتك وتنسى محدوديتك ..
فكره الاتزان دى مهمه جدا واحتياجنا ليها مش نابع من النهارده ..
فى الحقيقه احتياجنا للاتزان بيبتدى من اول يوم نتولد فيه !
فى ثلاثه امراض شهيره جدا فى تغذيه الطفل الرضيع
بس انا هتكلم عن مرض واحد منهم النهارده وده اللى يخصنا فى الاتزان الا وهو الكواشيركور "kwashiorkor "KWO
وده مرض بينتج من عدم اتزان الغذاء المقدم للطفل.
وبنلاقيه اكتر فى الدول الناميه زى حلاتنا كده فى مصر ..
ويصير هذا الغذاء المكوّن اساسا من الكربوهيدرات هو المصدر الوحيد لغذاء الطفل
والطفل شكله على هذا الغذاء يبدوا لطيفا ومتربى على الغالى يعنى !
وشه مدور ومليان وبطنه كبيره .. طيب بيجى ليه المستشفى ؟!
بيجى علشان بسبب عدم اتزان الاكل المقدم ليه ..
صحيح وشه مدور وخدوده مكلبظه وبيسموه وجه القمر Moon Face بس للاسف مناعته ضعيفه جدا علشان مفيش احماض امينيه يصنّع منها الاجسان المضاده اللى بتحمى الجسم من امراض كتيره وطبعا عضلاته ضعيفه وحجمها صغير بالمقارنه بالطفل الطبيعى .. شعر راسه ضعيف .. بطنه كبيره قوى .. جسمه مورم ..معرض لاى مرض .. جلده كله محمر ولونه غريب .. وطبعا لا بيكبر فى الطول ولا الوزن و قدراته الذهنيه ضعيفه ومتاخره.. متوتر دايما وهمدان .. الخ
من الاخر كده حالته بالبلى ..
الام تيجى تفهمها ان المشكله فى التغذيه بتاعته تبصللك كده وكأنها هتاكلك وتقولك مش شايف يا دكتور ده وشه مدور ذى القمر و جسمه مليان !ونبتدى بقى نفهّم .. آه صحيح من برا يمكن متحسيش ان ابنك تغذيته سيئه وخاطئه ولكن كل الشكاوى اللى بيشتكيها دى اصلها سوء تغذيته ..
متتغريش بالمنظر اللى برا !
دى مجرد دهون .. اه مهمه بس مينفعش تبقى بديل على البرونينات
لازم اقدم لطفلى وجبه متوازنه من الكل ..
كربوهيدرات ونشويات وبروتينات
علشان من غير اتزان هبقى عرضه لامراض كثيره ..
متغرش من منظرى برا المهم وظايف جسمى عامله ايه وصحتة ايه ؟؟
فتح عينك لنفسك لئلا تكون متكل على نوع واحد فى حياتك ..
لتكون متكل حتى على ربنا ومبتقابلش الناس .. اوع تكون فاكر ان ده الصح .. ده بعيد كل البعد عن الروحانيه !
اوع تكون مهمل فى حق نفسك ومطنشها وبتهرب منها وبترفض تسمعلها وسايبها فى انينها من غير ما حتى تبص عليها ..
اوع يكون جسمك هو همك الوحيد وشكلك وصحتك ولياقتك هى شغلك الشاغل ..
حتى فى حياتنا الروحيه محتاجين اتزان بين المشاعر والعواطف والعلاقه الشخصيه مع الله وبين فهم صلب الدين والعقيده والتاريخ ..
قد ايه الاتزان فى كل ده حاجه صعبه وكأنه فعلا رقص على حبال معلقه فى الهواء ..
بدايه طريق الاتزان هو الوعى بعدم الاتزان وخطورته على حياتى ..
مجرد نور يوضحلى انى ماشى غلط ده لوحده خطوه مهمه لكسر الانكار و وهم انى اقدر اعيش مكتفيا بواحد دون الاخر ..وبعدين تيجى نقطه التذوق .. يعنى ابتدى ادوق الحاجات اللى نقصانى دى ...
احاول اخرج للاخر واكسر الاسوار اللى حاططها حمايه لنفسى ومنعانى من الاتصال بالاخر ..
اقعد مع نفسى حبه واسمعها .. امسك ورقه وقلم واكتب اللى يجى فى بالى ..
اشوف عقلى الباطن بيفكر ازاى .. ابتدى اقرى فى كتب واتامل واخد فتره هدوء بعيد عن دوامه الحياه ..
احاول اتعمق فى علاقتى مع ربنا وابتدى ادرس دينى كويس واقرا الكلام وادور على تفاسير وابتدى احاول ادور وابحث عن الحقايق .. الخ
وقت ما هدوق هادرك اللى كان ناقصنى واهميته فى حياتى وهشوف حياتى بيه بقى حالها قارق ازاى وازاى بقيت احسن لما بقيت اسعى نحو الاتزان ..
اتزن حتى بعد ما ادركت جمال الجزء اللى انا كنت مهمله ..
ادى كل حاجه حقها حسب الطبيعى ..
الله انا الاخر
الثلاثه كل منهم يلعب دوراً مهما ويؤثر ويتأثر بالاخر كلن حسب اهميته ..
الثلاثه عليهم ان يتزنوا جيدا ولا نركن لواحد فقط ونهمل الباقى او نقلل من دوره ..
حتى فى نضوجنا ننضج روحيا نفسيا وجسمانيا الثلاثه باتزان.
معلومات طبيه اكتر هنا :
http://www.ncbi.nlm.nih.gov/pubmedhealth/PMH0002571/
