فى شغلنا كجراحين عظام موضوع التوقيتات دة بيضايقنا قوى
خصوصا الجراحين الشباب اللى زى حالاتى كده
اوقات كمان بتوصل انه بيضايق المريض واهل المريض
الجراح عاوز يشتغل
والمريض عاوز يخف ويمشي
كل تاخير فى العمليه مزعج ..
امال مين العائق ؟
معظم الجراحين هيكونوا عرفوا الاجابه
القضيه تكمن فى طبيب التخدير اللى هينوم العيان علشان يتعمل له العمليه
والحقيقه ان مش ده العائق الحقيقي
عارفين العائق الحقيقي ايه ؟
المريض نفسه !
صحه المريض وقدره الجسد على التحمل ..
الموضوع ده بيدخل فيه عوامل كتير ..
طول فتره العمليه ونوعها !
احتمالات حدوث النزيف (Bloody Operations) !
قدره القلب على تحمل التخدير لفتره طويله !
وظائف الكبد وقدرته على تحمل ادويه التخدير !
وجود فيروس فى الكبد ونشاطه !
وظائف الكلى وقدرتها على التخلص من السموم !
وجود مرض السكر من عدمه .. بقاله كام سنه .. هل متظبط ولا فى لخبطه .. !
قدره الجسم على الالتئام !
وجود مرض الضغط .. متظبط ولا لا !
الحاله العامه للمريض .. التغذيه !
وجود عدوى سواء فى الكسر او فى اماكن اخرى كالصدر !
ليله كبيره قووووى وقرار مش سهل انك تدخل اوضه العمليات حتى لو محتاج لده قوى
كلمه "Fit" اى لائق لدخول العمليه مش بتتكتب بسهوله وكتابتها معناها مسئوليه كامله
طبعا تيجى تتكلم مع العيان انه لازم يتظبط فيه حاجات كتير علشان يدخل العمليه
تلاقيه يتدايق قوى ..
بس الحقيقه
انا مينفعش ادخلك على "العلاج النهائى" على طول كده
فى اساسيات لازم تعدى عليها ..
طبعا بيكون اتعملك "الاسعافات الاوليه" و تاكدنا من سلامه وظائف الجسد الحيويه
من تنفس ودوره دمويه الخ
دى اساسيات و حقك ولازم تتعمل اول حاجه..
ولكن علشان تدخل العمليه لازم بعد الاساسيات "تتجهز" لدخول العمليه
لازم تكون لائق للعمليه وده بيكون من خلال طبيب الباطنه/اطفال مع طبيب التخدير وباقى التخصصات لو كان عندك مشاكل فى حاجات تانيه ..
وقت ما تكون Fit اى لائق وقتها تدخل ..
طب انا هقعد فتره طويله فى التحضير .. معلش مفيش ضرر
مش الاسعافات الاوليه اتعملتلك والعلامات الحيويه من نبض وضغط وحراره متظبطه
اذن لا ضرر من الانتظار
حد فاهم انا عاوز اقول ايه ؟
احنا فى حياتنا مستعجلين قوووى على العمليه النهائيه .. العلاج النهائى .. الحل الاخير
دايما مش طايقين فتره التاهيل للعلاج النهائى
وهى فتره مؤلمه بالفعل ..
قاعد بيتهيئلك انك مبتعملش حاجه .. الم مستمر لانك لسه مكسور ولسه متعملتلكش العمليه
وبتاخد ادويه وبيتعملك فحوصات وانت مش فاهم ليه
كل اللى شايفه المك الحالى وحلك فى العمليه ..
اما ما بين الكسر والعمليه انت مش مدركه خالص ولا مدرك اهميته ..
فطبعا متدايق وطبعا متالم وطبعا دماغك هتتفرتك من سؤال "ليه"
ليه يارب كده ..
ليه فشل ورا فشل !
ليه تدخلنى فى موضوع انت عارف انه مش هيكمل !
لييييه !
ليه لازم اتالم ! ليه لازم اتكسر!
ليه لازم تاخد ايدى وتعرفنى تماما ان اللى انا نفسي فيه مش هينفع بالطريقه اللى انا عاوزها دى !
مكنش ينفع حل اسهل من كده !
الحقيقه ان مش كل التعب اللى بيحصل فى حياتنا هو النهايه .. ده اسمه التاهيل
ان الله يا احبائى يؤهلنا لمجد عظيم جدا ليس فقط فى هذا الدهر بل وفى الحياه الابديه
كل التعب اللى بنمر بيه ..
كل الفشل ..
كل انكسار للقلب والنفس والروح ..
صدقنى مش دى النهايه ابدا
كل ده بيحصل علشان جوانا مشاكل كتير محتاجه تتظبط قبل ما ندخل اوضه العمليات
قبل ما ننال الراحه النهائيه ويتم حل المشكله حل جذرى ..
قبل ما ننام ونتخدر ونكون مستعدين للحل النهائى
وانا مقصدش بالحل النهائى السماء والحياه الابديه !
بالطبع ده الحل النهائى لكل التعب اللى موجود فى الحياه
لكن وسط الحياه احنا بندخل عمليات صغيره كتيره وبنوصل فيها للحل النهائى
فشل متكرر فى ارتباط ..
فشل متكرر فى العمل ..
فشل متكرر فى الدراسه ..
فشل متكرر فى الحياه الاجتماعيه..
فشل متكرر فى نجاح العلاقات الاسريه..
ثق يا حبيبى فى توقيتات الله
الله حكيم جدا ومش هيدخلنا للحل النهائى فى اى فشل الا لما نجهز ..
ممكن نساعده فى اننا نجهز بسرعه ووقتها هتكون عيان شاطر ..
التزامك بالادويه والعلاج .. تحمل الالم اثناء التجهيز ..
الصبر .. الثقه .. التفائل .. المرونه فى العلاج
بكره احلى وهنخف صدقونى
وهنقوم وهنتنطط وهنرجع اقوى كمان من الاول
الله لن يتركنا ابدا
دمتم معافين
تقدر تقرا معلومات طبيه اكتر عن تجهيز المريض للعمليات من هنا :
====================================
