صوره دم كامله

صوره الدم الكامله من ابسط التحاليل اللى بتطلب من المريض
وببساطه هى بتقيس عدد خلايا موجوده فى الدم زى كرات الدم الحمراء
وكرات الدم البيضاء بانواعها والصفائح الدمويه
ونتائجها عباره عن ارقام زى ما انت شايف كده ..

ويظن الكثيرين ان الطبيب يبحث عن عدد الخلايا الناقص
وكعادتنا كمصريين لو لقينا خلايا عددها زائد ده معناه صحه ومناعه
حد يلاقى زياده ومينبسطش يا جدع !

لكن الحقيقه مش كده ..


جسمنا بيشتغل فى هارمونى رهيب ودقيق مش سوق
واى زياده او نقص بيعكس امراض بعضها مميت

تعالا ناخد شويه امثله من خلال صوره الدم :

* كرات الدم الحمراء RBCs ودى المسئولة عن توصيل الاكسجين للخلايا
 لو قلت تعمل انيميا وضعف ..

طب لو زادت ؟

اوه ! اكيد غذا واكسجين اكتر !

اطلاقا ..
زياده عدد كرات الدم الحمراء بيعمل مرض اسمه Polycythaemia Rubra Vera
مرض ! ايوه ..

شوف زياده عدد كرات الدم الحمراء يعمل ايه ..
ارهاق، زغلله، صداع، دوخه، هرش، تضخم الطحال، الم فى البطن، زياده لزوجه الدم وتعرضه لجلطات او نزيف [1]
تخيل اللى مسئول عن الغذاء وتوصيل الاكسجين لما يزيد عن حده يعمل ايه ..

مثال كمان

* كرات الدم البيضاء WBCs ودى المسئولة عن حمايه الجسم من الامراض ( جهاز المناعه)
لو قلت يبقى المريض عنده ضعف فى المناعه ولو قلت قوى ممكن يكون عنده ايدز او امراض بتعمل احباط للنخاع اللى بيصنع الخلايا دى ..

طب لو زادت ..
اوبا بقي ! مناعه زياده وقوه وحصانه ضد الامراض ..

اطلاقا !
زياده عدد كرات الدم البيضاء معناها وجود مشكله او عدوى وجهاز المناعه بيحاول يقاومها ويقتلها عن طريق زياده خلايا الدم البيضاء ..

طب لو زادت بشكل عالى قوى ..
ده معناه ان احتمال كبير يكون فيه سرطان فى الدم Leucemia !!

سرطان الدم فى اغلب انواعه فيه زياده فى انواع معينه من خلايا الدم البيضاء بارقام خرافيه وطبعا غير فعاله [2]

سرطان !
ايوه
زياده الخلايا اللى بتدافع عن جسمك ممكن تكون سرطان مش قوه ولا مناعه ولا صحه

عاوز اقولك ايه يا صاحبي ..
على سطح الحياه نهتم بالارقام وبتبقى الارقام دلاله القيمه
ولكن فى عمق الحياه الوضع مختلف تماما
فى العمق نبحث عن الفاعليه لا الكميه
فى العمق نعلم ان كل انحراف ايجابى او سلبي هو انحراف ..

ان التسيب انحراف وان التشدد ايضا انحراف ..
فالطريق الوسطى والاعتدال قد خلص كثيرين

ففى عملك او صلاتك او علاقاتك اهتم بالنوعيه لا الكميه
اهتم مش انك تصلى وخلاص لكن انك تكلم ربنا من قلبك .. ميبقاش همك انا صليت كام مره لكن انا كلمت ربنا كام مره من قلبي .. حسيت بيه وبوجوده وكانى فعلا واقف قدام عرشه ..

اهتم بعمل الرحمه مش مجرد عشور وكميه فلوس لكن قلب يحس بتعب الاخر
اهتم تقرا مش بالكميه لكن ايه واحده ممكن تغير حياتك لو اخدتها بقلبك وعشتها مش مجرد عرفتها ..
وهكذا ..

اهتم بالاعتدال و بالفاعليه لا بتستيف الاوراق والروتينه
لا تدع الحياه تخنفك باهتمامها بالمظهريه
وانما كن فعالا 


راجع:
====

[1] http://www.leukaemia.org.au/blood-cancers/myeloproliferative-neoplasms-mpn/polycythaemia-vera

[2]http://www.cancer.org/cancer/leukemia/