كلَّ حين

الصلاه ايه بالنسبه لك ؟
ممارسه روحيه علشان تقرب من خلالها لربنا ؟ هل هى روتين اعتدنا عليه ؟ هل هى صله حقيقيه بتربطك بالسما ؟
طيب ايه اللى يحصل لو مصلتش يوم ؟ آخررها ايه يعنى ؟!ايه اللى هيحصل لو كسلت النهارده ؟!
ما هو الصلاه موجوده عادى يعنى و احنا نقدر نقف قدام ربنا ونصلى فى اى وقت ..
طيب ايه اللى هيحصل لما يعدى علىّ اكتر من يوم وانا مش بصلى !
وليه كام يوم يا عم قول كام شهر ولا كام سنه وانا بعيد عن ربنا و عن الصلاه ؟
هيا الصلاه ايه بالنسبه لك ؟!

تعال نشوف ..

من المعلومات الجميله جدا عن تغذيه الطفل وهو فى بطن مامته هو التنفس
كل انسجه الطفل بتكون محتاجه تاخد اوكسجين و محتاجه انها تَخرَّج ثانى اكسيد الكربون وبعض المواد الناتجه عن التمثيل الغذائى
ولأن الطفل فى بطن مامته مش مُتاح ليه انه يستخدم رئته فبياخد احتياجاته من الغذاء والاكسجين عن طريق دم الام من خلال المشيمهPlacenta و الحبل السُرّى Umbilical Cord

بمعنى انه من خلال رئه الام بيتم تبادل الغازات يعنى تاخد الاكسجين للدم وتطلع ثانى اكسيد الكربون والاكسجين الجديد اللى الام بتاخده من خلال الرئه بتاعتها و بيمشى فى الدم فى كرات الدم الحمراء جزء منه بيستخدمه جسد الام والجزء التانى بياخده البيبى من خلال المشيمه علىشان يستخدمه هوّ كمان ...
الخلاصه انه من خلال رئه ودم الام البيبى بياخد احتياجاته من الاكسجين ويخرج فضلاته من ثانى اكسيد الكربون

ولمّا بتتم الولاده بيقوم الطبيب بقص الحبل السُرّى الذى كان يربط بين جسد الام وجسد الطفل فينقطع مصدر الاكسجين للطفل وهنا بيبتدى الجهاز التنفسى للطفل فى العمل لأول مره ويبتدى ياخد نفسه من خلال رئته هوّ
ولأن دى بتكون اول مره البيبى يستخدم فيها عضلات التنفس وصدره بيتفتح ورئته بتمتلىء من الهواء وبتبتدى عمليه تبادل الغازات فبتؤدى الى الم شديد جدا للبيبى ووقتها بيبتدى يعيط ودموعه تنزل من كتر الم عمليه التنفس اللى هو بيعملها لاول مره لوحده من خلال رئته ...

وده اللى احنا بنلاحظه ان اول ما الطبيب بيقطع الحبل السُرّى البيبى بيبكى ويصرخ على طول من شده الالم ..

ولكن مع مرور الوقت بيبتدى يتعود على عمليه التنفس وعضلات التنفس بتتعود على الشغل ده فيروح الالم ويبدأ البيبى يهدا خالص ويتم التنفس تلقائياً بدون اى مجهود او ادراك منه بعمليه التنفس ..

وده اللى احنا بنلاحظه كناس بالغين ان عمليه التنفس بتتم دون اى ادراك او وعى مننا .. عمليه تلقائيه ولكنها مهمه جدا جدا وهى اللى من خلالها بيقدر الجسم انه ياخد الاوكسجين اللازم لكل العمليات الحيويه اللى داخل الجسم ويخرج فضلات العمليات دى فى صوره ثانى اكسيد الكربون ..

انت تعرف ان مخك لوحده بيستهلك 20% من الاكسجين اللى موجود فى الدم رغم ان المخ وزنه لا يمثل اكثر من 2% من وزن الجسم .. وده بيوضح قد ايه الاكسجين مهم جدا لوظائف الجسم وخصوصا المخ اللى بيعتمد على الاوكسجين اللى فى الدم اعتماد كُلىِّ..

ايه يحصل بقى لو حد جه كتم نفسك او انت موجود فى مكان مفهوش اكسجين كتير ..
الموضوع درجات ..

يعنى وانت موجود فى مكان مفهوش تهويه كويس كله كتمه وفيه ناس كتير و زحمه تلاقى نفسك مخنوق ومش عارف تتنفس و تيتدى تحس حبه حبه ان تركيزك ابتدى يقل وده لان الاكسجين اللى واصل للمخ عن طريق الدم قليل فبيبتدي يأثر على وعيك وده تلاحظه كمان لما تطلع من المكان الردىء التهويه ده لمكان مفتوح وفيه هوا تلاقى نفسك فجأه فوقت واستعدت نشاطك
ولكن لو فضلت فى الجو ده ممكن تبتدى تحس بالدوخه وضربات قلبك تزيد فى محاوله منها لزياده سرعه تبادل الغازات فى الرئه و وصول اكسجين للمخ

ولو زاد الموضوع عن حدود معينه يبتدى الانسان يدخل فى غيبوبه او تشنجات او فقدان للذاكره ( زى الناس اللى تكون بتغرق وفضلت وقت طويل فى الميه فلما حد ينقذها و تفوق مبتفتكرش اصلا اللى حصل) او يبتدى الجسم يزرّق الى ان ينتهى الموضوع بموت خلايا المخ لو موصلش الاوكسجين للمخ مده تزيد عن 3-6 دقائق

الزتونه فين بقى ؟!

الصلاه تُشبه قوى موضوع التنفس .. ازاى ؟!
احنا بتعلم نصلى من خلال اهالينا لما بنشوفهم بيصلوا ومن خلال الكنيسه ومدارس الاحد والمُعلمين والمرشدين اللى موجودين فى حياتنا ..
فذى ما البيبى وهو فى بطن مامته بياخد الاكسجين من الحبل السُرّى هكذا نحن ايضا بنتعلم الصلاه وازاى نكلم ربنا ونسمع صوته من خلال الكنيسه واحنا اطفال ..
ولكن مع مرور الوقت بنكبر ونبتدى نتعلم نصلى لوحدنا زى ما البيبى بيتعلم ياخد نفسه لوحده بعد الولاده ..
صحيح التنفس بيكون فى الاول صعب ومؤلم وهكذا الصلاه ايضا تحتاج فى البدايه الى التغصب وانى اُلزِم نفسى انى اصلى لربنا بأنتظام كل يوم ولكن مع التّعود والممارسه بتبقى الصلاه حاجه اساسيه فى حياتى بتتم بشكل تلقائى طبيعى زى ما الطفل بيتعود على عمليه التنفس و خلاص متبقاش بالنسبه له عمليه مؤلمه بل بالعكس يجرى ويتنطنط و ينهج عادى خالص

وهذه هى وصيه الله لنا .. ينبغى ان يُصَلى كل حين ولا يمل ..
عمرك شفت نفسك زهقت مره من انك تاخد نَفَسك ؟!
عمرك فى مره كسلت على انك تاخد نفسك ؟!
وهنا بيطلع سؤال عجيب ومحير ...
اشمعنا الصلاه ؟!!!
اليست الصلاه هى علاقه حيه مع الله .. هو مش ربنا هو مصدر قوتى وطاقتى .. به أُوجَد واحيا واتحرك ..
وهو نفسه اللى وصانى باهميه الصلاه وطالبنى انى اصلى فى كل وقت ..
يعنى يكون قلبى وعقلى مشغولين بيه طول الوقت .. بفكر فيه كل الوقت ..
قلبى بيكلم ربنا ويرفعله صلوات كل الوقت مش مجرد صليت فى اوقات معينه الصبح مثلا او باليل وخلاص
لا .. ده ربنا عاوزنى اكون معاه فى علاقه حيه مستمره طول اليوم لا تقتصر فقط على صلوات محفوظه ولكنها علاقه حيه مستمره طول اليوم وكل يوم .. وهذه هى وصيته

وزى ما لو احنا متنفسناش من 3-6 دقائق والمخ موصلهوش احتياجاته من الاكسجين بيموت هكذا فى الصلاه ايضا ..
فى اى وقت نفكر فيه ونقول معلش هنفوت المره دى .. اصلى تعبان .. جسمى مكسر .. الشفل هاددنى وواخد كل طاقتى .. عندى كُليه الصبح بدرى ولازم انام .. فده كأنى حكمت على نفسى بالموت
احنا بنحكم على نفسنا بالموت لما نقرر فى اى يوم اننا منصليش فيه ..

صدقونى عمل الله معانا فى اى وقت ونحن بعيد عنه وهو يرجعنا يشبه بالظبط اقامه ميت ..
انسان ابتعد عن مصدر الاكسجين الخاص بيه و اهمل حياته فمات ..
فى كل مره ترجع فيها لربنا بعد فتره انقطاع اعرف انك ميت ..
ولكن الله من محبته لينا بيقبلنا تانى ويقيم الميت من بين الاموات ويعود يحينا علشان نعيش معاه

ابنى هذا كان ميتا فعاش وكان ضالا فوجد ..



الصلاه مهمه جدا كاهميه الاكسجين لمخك !
لا تهملها ابدا واغصب نفسك عليها حتى تتعود عليها ثم تتعلم ان تتلذذ بها !
ان كنت ميتا بعيدا عن حياه الصلاه والعشره الحقيقيه مع الله فاعلم ان الله ينتظرك ليقيم الميت الذى داخلك ويمنحك حياه 
فارجع اليه ولا تتوانى فى الموت


معلومات طبيه اكتر هتلاقيها هنا :

http://www.youtube.com/watch?v=OV8wtPYGE-I

http://www.acnp.org/g4/gn401000064/ch064.html

http://www.buzzle.com/articles/lack-of-oxygen-to-the-brain.html

http://science.howstuffworks.com/life/inside-the-mind/human-brain/brain-death1.htm