ومالوا

يا عم "متحبكهاش"
"فكها شويه"
ومالو يا اخى !
ما تجرب ..
مش يمكن تعجبك ؟!
مهو ياما ناس عملت كذا وحصلهمش حاجه
لسه مصدق انه غلط !
"فكك" ما كله بيعمل كده

كلمات كثيره على هذا المنوال بيزن بيها الشيطان واصدقاء السوء -المضحوكين عليهم- علشان تتنازل مره عن قيمه او مبدأ واخده فى حياتك ..
بيتفلسفوا فى المبادىء ويحللوا الخطأ بافكار غريبه ..
ونحن نعيش فى مجتمع تتزايد فيه دعوات التحرر وتجربه الجديد بدون وعى
نتعرض لخطر شديد يسمى "التهاون" او "الاستهانه"

نفس الفكره بتحصل فى جسدنا فى مواجهه الامراض

عزيزى
ان خطوره بعض الامراض تكمن فى خمونها لفتره
بيسموها اهل الطب "The Incubation Period"
وهى الفتره التى تفصل بين الاصابه بالعدوى وبين ظهور اعراض المرض

يعنى مثلا فيروس الانفلونزا بياخد من يوم الى ثلاث ايام علشان تبان اعراض الانفلونزا على المريض
اما الجديرى فبياخد من 14-16 يوم علشان تظهر اعراضه

المصيبه بقى ان فى بعض الامراض ممكن يفضل الفيروس خامن لسنين وبعدين ينشط

وتقول ايه ده
ايه اللى جاب المرض ده عندى
يقولك اصل من 5 او 10 سنين عملت عمليه بس كانت ملوثه او سافرت منطقه معينه واخدت العدوى منها
طب ما بانش ليه بعد العمليه على طول ولا لما رجعت من السفر..
يقولك لأ .. طبيعه الفيروس ده انه ممكن يفضل خامل لسنين


لأ والادهى بقى ايه .. ان فيه حاجه اسمها "Carrier" يعنى "حامل للعدوى" ...
يغنى حضرتك عندك العدوى وعمال بتنقل للناس العدوى دى
ولا انت حاسس ولا هما حاسين بالمصايب اللى بتنقلوها لبعض

ونيجى بعد سنين نندم ونقول ياريتنا كنا اخدنا بالنا ..

والحكايه كلها تبقى باديه ب "ومالوا" ..
ومالوا لما اتفرج على مواقع اباحيه .. اهو منها ثقافه ومنها بضيع شحنه او وقت
ومالوا لما اهذر هذار مش كويس واقول كلام قبيح وكله بحجه ده هذار يا عم
ومالوا لما اشوف منظر معثر وبدل ما احول عينى لأ اقعد اتامل فيه

ومالوا لما ادخل فى علاقات عاطفيه وانا عارف انى مش جاهز للارتباط ولا وصلتش للنضوج الكافى .. بس اهو بندوق طعم الحب وبنتسلى
ومالوا لما البس لبس معثر.. نفسى ابان جميله والناس تتكلم عن جمالى
ومالوا لما اجرب سجائر ولا ترامادول .. يا عم احنا لسه شباب وعايزين نعيش حياتنا

وتعدى سنين ..
والاقى مخى بقى قذر من كتر الافكار الجنسيه وبقيت مدمن جنس وكل حاجه بشوفها حواليا بتفكرنى او تدينى ايحاء بيه
ولا الاقى لسانى مش عارف يبطل شتايم مش كويسه من كتر ما سمعتها ومهربتش منها
والاقينى دخلت فى علاقات عاطفيه كتير وبوظت نفسى وجرحت نفسى و غيرى ومبقتش لا قادر ولا عارف احب من كتر اللى عملته فى نفسى

ولا لبسى اللى يبقى اعثر ناس كتير ودلوقتى الناس مش بتبصلى الا على انى جسد وبس لكن لا شخصيتى ولا فكرى ولا كيانى يفرق معاهم فى حاجه
ولا السجائر اللى بدايه الطريق للادمان الحقيقى هى والزفت الترامادول .. وتلاقى نفسك عمال تصوت وانت بتغرق .. ولا قادر تساعد نفسك ولا حتى غيرك عارف يساعدك ....

ارجوك .. احذر
خد بالك من نفسك قوى .. لاننا فى زمن صعب جدا
الامراض النفسيه والاخلاقيه منتشره بشكل صعب
ولو مكنتش عينك فى وسط راسك وواخد بالك لنفسك قوى هتبهدل نفسك وهتبهدل اللى حواليك معاك ....


معلومات طبيه اكتر هنا:
http://www.ncbi.nlm.nih.gov/pmc/articles/PMC3424805/
http://en.wikipedia.org/wiki/Incubation_period