* هذا المقال اهداء إلى صديقىَّ العزيزين انطونيوس و ايلاريا بمناسبه خطوبتهما ،الرب يبارك حياتكما ويتمم ارتباطكما بزواج مبارك وحياه سعيده للمنتهى
المقربين لى يعلمون ان كل ما اكتبه هنا هو نتاج دروس حياتيه
اعتقد ان الدرس ده من اهم الدروس فى حياتى
وكان لبعض اصدقائى دور عظيم فى توضيح المفاهيم دى جوايا
اتمنى انكم تخرجوا بفايده من قرايته
--------------------------------------
كل نوع ليه وظيفه معينه ليها معنى وقيمه فى مكانها فى العضو الصحيح
وكون الخلايا مختلفه لكن الاختلاف ده مش معناه ان فيه خلايا احسن من خلايا
لكن الكل بيؤدى وظيفته فى العضو اللى موجود فيه
والنتيجه الهارمونى اللى بيحصل فينا كجسد واحد ..
كل خليه ربنا اداها مواهب معينه وقدرات معينه علشان تعرف تأدى وظيفتها صح
فمثلا ، خلايا المعده من وظايفها انها تفرز سائل فيه حمض قوى Hcl علشان يهضم الاكل و يٌفَّعل الانزيمات بتاعت الهضم
طيب الحمض ده مش ممكن يدمر الخلايا نفسها ؟
طبعا .. وعلشان كده ربنا خلق جوه الخلايا دى طريقه فريده لحمايتها من السائل الحمضى والانزيمات اللى بتاكل الاكل
المميزات دى مش موجوده فى باقى خلايا الجسم لانها ببساطه مش محتاجاها ، ومش من وظيفتها اصلا ..
طيب يحصل ايه لو الحمض ده بدل ما يمشى فى مساره الطبيعى
جوه المعده ، طلع فوق ..
بيكون فيه الصمام بتاع المعده فيه مشكله ومفتوح ومبيقفلش وقت الهضم
فيطَلّع السائل الحمضى لفوق عند خلايا المرىء فيكوى الخلايا دى (الجزء اللى قبل المعده فى الجهاز الهضمى)
على مستوى الخلايا ده اسمه Irritation اى اثاره او تهييج للخلايا
وعلى مستوى حياتنا الشخصيه هى دى الضغوط الغير متوقعه اللى ممكن نواجهها فى الحياه
الم رهيب غير محتمل ..
طبعا !
حمض بيكوى خلايا المرىء الغير مجهزه اطلاقا لتحمل الحمض لانها مش من وظيفتها اصلا !
عاوز يحصلها كل ده وتسكت !
ايه العمل ؟
ضغط رهيب ومستمر ..
جهد مبذول غير عادى علشان الخلايا تقاوم وتعرف تعيش وسط السائل الحمضى اللى مش عادى ده
خلايا المرىء اللى قريبه من المعده يحصل فيها تكاثر غير عادى للخلايا Hyperplasia
علشان تقاوم الضغط ده ..
كلها محاولات علشان الجسد يقاوم ..
على امل ان الانسان يحس بالضغط الغير طبيعى الموجود ده
ويروح لطبيب وياخد علاج او حتى يعمل عمليه فيقفل صمام المعده فميرجعش الحمض لفوق
والدنيا تخف والضغوط تنتهى ..
لكن اذا اهمل الانسان
واستمر الضغط ده لسنين
تبتدى الخلايا تتغير ...
تتغير!
ازاى يعنى ؟؟
ايوه ..
بيسموا الحدث ده Metaplasia
يعنى فى مثالنا الخلايا الطبيعيه فى المرىء تتحول لنوع اخر من الخلايا مش موجود طبيعى فى المكان ده ..
الخلايا دى تقدر تفرز مخاط بيه بتعادل الحمض اللى بيكويها كل شويه ..
حاسسها حاجه حلوه ؟؟؟؟
الخليه قدرت تغير من نفسها علشان تقاوم
برافو عليكى يا خليه .. قدرتك على التَكيّف رهيبه !
لكن لسه للقصه بقيه ..
مع استمرار ارتجاع الحمض
حتى مع تغير نوع الخليه
بردوا مبتقدرش تقاوم ..
لانها من الاول متخلقتش علشان كده !
هى نوعها نوع تانى وغيرت من نفسها علشان تقدر تقاوم حبه
لكن مع استمرار ارتجاع السائل الحمضى للمرىء بيبتدى شكل ومكونات الخليه يتغير ويحصل حاجه اسمها Dysplasia
الــ Dysplasia هى الخطوه ما قبل الاولى فى تكوين سرطان المرىء !
ودى اول خطوه Irreversible غير قابله للرجوع
يعنى من قبل ما تحصل ال Dysplasia لوالمشكله اتحلت والضغط على مستوى الـ Hyperplasia & Metaplasia اختفى ، ممكن ترجع الخلايا لطبيعتها الاولى اللى خلقها ربنا لكن لو استمر الضغط فباقى التغيرات كلها Irreversible يعنى لايمكن التراجع عنها
ايوه ..
تبتدى الخلايا تتشوه Dysplasia ودى ليها مراحل
بتنتهى بسرطان فى المرحله الاولى Carcinoma in situ
ثم يبدأ السرطان فى الانتشار والتوغل فى الجسد كله Anaplasia ...
بص يا صديقى ..
والضغط ده يستمر فتره طويله
ومن غير اى علاج لاسبابه
ده نهايته حاجه واحده ..
سرطان و موت !
دى قوانين جسدنا وقوانين الطبيعه ..
استمرارك فى مكان فيه ضغوط مش طبيعيه لفتره طويله جدا هيشوه نفسك ويدمرها
بتكون فيها مش انت ..
بتبذل مجهود خرافى علشان ترضى اللى قدامك ..
اعرف نهايتها خراب و موت لو كملت فيها لواستمريت للنهايه ..
قدرتنا على التكيف والتأقلم مش معناها اننا نعيش عمرنا كله تحت الضغوط !
زى خلايا المرىء بتعدى ب Hyperplasia & Metaplasia وبتفضل سنين مستحمله ..
لكن للتكيف والتأقلم حدود لما بنتخطاها بنخلق سرطان وموت جوانا
مش طبيعى نعيش حياتنا كلها مش على طبيعتنا !
احذر !فيه فرق بين اللى بقوله وبين تطوير النفس ..
تطوير النفس معناها انى قابل نفسى وبشتغل عليها بالتدريج علشان اطلع احسن ما عندى
لكن انا مش "بنكر" نفسى
مش بتقمص شخصيه مش شخصيتى .. طبيعه مش طبيعتى
مش بحاول اخلع جلدى وكل حاجه تخصنى
لا لا ،، ده لا يمت للتغير بصله
خلايا الكبد وقدرتها على تنقيه السموم ،
خلايا القلب وقدرتها على الانقباض بمفردها .. الخ
مينفعش القلب يقول عاوز اقاوم الاحماض ، ولا المعده تقول عاوزه اكون زى القلب !
ده مش تطوير ابدا !
ده ضغط رهيب على نفسك علشان تكون انسان تانى
علشان تغير Core او اساسك اللى خلقك عليه ربنا وميزك بيه عن باقى الناس
وعمر ما ده كان التغير ابدا !
شخصيتك ، فكرك ، قلبك ..
محتاج تطور ،،
طبعا كلنا محتاجين
لكن محتاج تلغى نفسك وتكون انسان تانى فلا
اسف يا صديقى،
انت بتخلق ضغط هائل على نفسك وسيفشل ويجعل منك مسخا (سرطان)
لا انت عرفت توصل للشخصيه اللى عاوز تكونها ولا انت قدرت تكون نفسك على طبيعتك ..
حتى الضغوط اللى بتعملها الخطيه على ارواحنا ممكن تنتج فينا روح مشوهه
ولكن استمرارنا لسنين بدون مقاومه للخطيه بيشوه ارواحنا
يخلق مننا ناس نكاد نكون غير قابلين للعلاج
طبعا باب التوبه مفتوح
بس الخطيه اللى جذورها عميقه جدا لسنين بتحتاج مجهود رهيب من الانسان ونعمه من الله
ويا تتوب يا ماتتوبش وانتكاسات متكرره ..
طب ليه ؟!!
ابعد عن الخطيه بكل قدرتك واطلب معونه ربنا
لا تقع تحت ضغطها وقدرتها على تشويه صورتك الجميله
قاوم !
العلاقات المشوهه Stress على انفسنا
العادات الخاطئه Stress على جسدنا
كوننا عاوزين نكون اشخاص غير انفسنا ده Stress على كياننا كله
لو لم نهتم بالمقاومه والعلاج هنتحول الى مسخ
سرطان .. موت
* لا تسمح ان تكون الا نفسك
* القدره على التكيف والتأقلم مهمه لكن لا يجب عليك ان تعيش كل حياتك ضغط على نفسك
* طور من نفسك
لكن اوع تفقد سمات شخصيتك الرئيسيه
* اوع تلغى نفسك فى علاقه بدافع الحب .. هتتخنق فى النهايه وتموت
* اوع تتهاون فى مقاومه الخطيه لتشوهك ومتعرفش نفسك انت مين ..
* اوع تستسلم لعاده جسديه تدمرك وتشوه جسدك !
معلومات اكتر عن الـ Cellular Adaptation :
* http://www.uic.edu/depts/mcpt/curriculum/cell1_ra_lecture.html
* https://en.wikipedia.org/wiki/Cellular_adaptation
* https://en.wikipedia.org/wiki/Dysplasia
* http://www.webmd.com/digestive-disorders/esophageal-cancer
* http://library.med.utah.edu/WebPath/NEOHTML/NEOPL106.html
