مين فينا بيحب الخساره ؟
معتقدش ،،
وحتى لما الحياه بتفرض علينا خساره ، بنحاول نجتهد اننا نقللها على قد ما نقدر
الخساره مش بس فلوس ..
الخساره خساره فرحه ، انبساط ، متعه ، لذه
الخساره خساره عمر ، خساره اصدقاء ، خساره اوساط اجتماعيه
الخساره خساره "حاله"،، حاله تهييس ، حاله امان، حاله نشوه
الخساره خساره مشاعر اعطيتها ،، او مشاعر مش هتعرف تاخدها تانى
احنا كأطباء وجراحين على فكره مابنحبش بردوا "الخساره"
يهمنا جدا انك تخف باقل خسائر ممكنه ..
بس الطب اوقات بيفرض علينا اننا نقبل خساره زياده فى سبيل انك تعيش اكتر ..
خساره فيها حياه !!!
ارتبط فكرنا ان الخساره دائما وحشه
لكن الطب ورانا ان فى خساره ممكن تكون هى السبب فى نجاتنا وحياتنا
خساره هتخلينا نعيش افضل ،،
مده اطول و نوعيه حياه اعلى
كل ده من خساره !
ايوه ..
مصطلح The Safety Margins
اى " الحــــــدود الآمنــــه"
ايه حكايه المصطلح ده ؟
المصطلح ده ليه علاقه بالاورام بانواعها .. الحميد و الخبيث
الاورام ده علم كبير جدا ،، كلامى ده بيتطبق على الاورام اللى قابله انها تتشال
يعنى الورم لسه فى بدايته ولم ينتشر لباقى الجسم ..
هو كتله من الخلايا المتحوله متجمعه فى صوره كلكيعه كده
سواء فى الجلد او تحته او فى عضو من اعضاء الجسم من جوه
طبعا يا سعده ويا بخته اللى اكتشف الورم فى بدايته خصوصا الورم الخبيث اللى نهايته مش حلوه
لما بيكون الورم فى مكانه كده بنحب نشيله ومنستناش طبعا لما ينتشر فى كل الجسم
هنا بقى تبتدى حكايتنا ..
هنشيله ازاى ؟
طبعا اننا نشيل الورم نفسه ده هوالاكيد .. وده طبعا خساره
لان فى يوم كانت الخلايا السرطانيه دى خلايا طبيعيه جدا لولا انها اتحولت بسبب معين لخلايا مسرطنه او بقت اورام حميده
اى ان كان ،،
المهم انه بقى فيه ضروره شديده اننا نشيل الخلايا دى من الجسد والا هتفسده وتموته ...
ولكن وجد العلماء اننا لما بنشيل خلايا سرطانيه من مكانها بترجع تكوَّن سرطان تانى !!!
وجدوا ان الورم الكلكيعه بيبعت خلايا سرطانيه صغيره قوى حواليه
لو كان الجراح خايف ومشالش غير الكلكيعه بس هتتبقى البذور الصغيره دى جوه العيان وبتكبر وتعمل سرطان تانى
وبعد ما يكون العيان خد الامان ان المرض اتشال ،، يفاجئه المرض تانى ويمكن يرجع بصوره اقصى ...
وهنا تبتدى عمليه الموازنه
اكتشفنا اننا محتاجين نشيل جزء من الانسجه المحاوطه بالورم (الككيعه) نفسها اللى بتبان طبيعيه ولكنها حامله للمرض ..
" انسجه شبه الشر " ...
طب نعمل ايه ؟
هنشيل العضو كله علشان خايفين من رجوع السرطان ،، لا ، لانها خساره لا تحتمل
العلماء وجدوا بالابحاث ان لكل ورم ليه حاجه اسمها الحدود الامنه The Surgical Safety Margins
ودى بتتم عن طريق حسبه معينه حسب نوع السرطان ومدى انتشاره فى العمق والسطح
فبنحدد مساحه وحجم الانسجه الطبيعيه المحيطه بالورم اللى لما اشيلها اكون قللت بكتير احتماليات رجوع الورم وفى نفس الوقت حافظت على العضو نفسه
احبائى،
احنا فى اوقات كتير بنساوم على حياتنا علشان خايفين نخسر "انسجه شبه الشر" المحيطه باورامنا
مش قابلين فكره اننا نخسر جزء فيه شبهة موت ..
وبجازف بحياتى علشان الخساره دى
.png)
لا يكفى ان ننزع عنا الورم المميت ولكن علينا ايضا ان ننزع عنا كل ما له شبه علاقه بهذا الورم ..
دى حياتنا .. متهزرش او تستهين لانه موضوع حياه او موت
رجوع المرض تانى بيكون اشد واصعب ومين يعرف وقت ما هتكتشفه هيبقى ممكن علاجه ولا فات الاوان
ليه تسيب بذره موت جوه قلبك ؟
اترك ولما تترك ، اترك صح
الشر وشبه الشر
ارفض شبه الشر مثلما ترفض الشر نفسه
شغل ، علاقات ، لذات ، مداخل للخطيه
احمى نفسك !
اقبل الخساره بشجاعه
الخساره اللى فيها حياتك ونجاتك
الخساره المحييه !
اقرا اكتر عن موضوع ال Safety Margins من هنا :
----------------------------------------------------------
