"الموضوع ده مش سهل عليا انى اتكلم فيه والكلام فيه مايجيش حاجه جنب الاحساس بيه والعيشه فيه ،، علشان كده مش هتلاقينى بتكلم كتير .. انت هتفهم من وسط الكلام كل اللى عاوز اقوله ومش قادر اعبر عنه .."
...
الحياه مليانه وجع والم ،،
فراق .. خيانه .. اساءات ..
فشل ..
ودايما فى الاوقات دى بنسأل نفسنا سؤال
ياترى ممكن نرجع تانى زى زمان ؟
ياترى هنخف ؟
ولا هيفضل الوجع موجود دايما جوه القلب ؟
فعلا الوقت بينسينا ولا دى كذبه ؟
الحياه مليانه وجع والم ،،
فراق .. خيانه .. اساءات ..
فشل ..
ودايما فى الاوقات دى بنسأل نفسنا سؤال
ياترى ممكن نرجع تانى زى زمان ؟
ياترى هنخف ؟
ولا هيفضل الوجع موجود دايما جوه القلب ؟
فعلا الوقت بينسينا ولا دى كذبه ؟
فى الكام موضوع الجايين هنتكلم عن التعافى فى جسد الانسان ،،يمكن يقدر يدينا فكره عن تعافى النفس البشريه ..
1- عمق الجرح
2- نظافه الجرح
3- التغذيه
فالجروح التى لا يزيد عمقها عن 0.5 سم تلتأم بسهوله جدا ولا تترك اى اثر نهائي ومش محتاجه خياطه ..
مجرد نظافه الجرح والاهتمام بالتغذيه الصحيه السليمه يضمن ان الجرح يلتأم نهائيا ولا يترك اى اثر
مثال لكده الكشوط او تعويره سكينه سطحيه ياما حصلت لنا كتير قوى ولا تترك اى اثر ..
وده لان حواف الجرح بتكون بعيده عن بعض فبتاخد فتره على ما تلتأم وبتسيب مكانها علامه scar وغالبا بيكون شكلها وحش ..
الخياطه فى الجروح دى فى خلال اول 6 ساعات بتكون مفيده قوى لانها بتقرب حواف الجرح من بعضه فبتقلل حجم العلامه اللى بتظهر بعدين وكمان بتقلل احتمالات اصابه الجرح بالعدوى لانه اتقفل خلاص ..
"الصوره اللى على الشمال بتوضح الجرح السطحى اللى واخد عمق قليل اما اليمين فبتوضح الجرح العميق اللى مخترق طبقات كتيره."
لكن اذا حدثت عدوى حتى لو كان جرح سطحى فغالبا هتأخر وقت الالتأم وكمان الجرح هيسيب علامه
نفس الحكايه لو التغذيه مش سليمه او العيان عنده امراض مش متظبطه زى السكر
كل ده بيأخر الالتأم وبيخلى احتمالات العدوى والعلامه ان يكون شكاها وحش اعلى بكتير ..
اللى عاوز اقوله ايه ....
فى مواقف وحشه هتعدى فى حياتنا وكأنها لم تكن ومش هتسيب اى اثر زى كل الجروح البسيطه اللى اتعورناها ايام الطفوله وملهاش اى اثر ...
لكن مش كل جرح فى حياتنا هيخف وكأنه لم يكن ،،
فى جروح عميقه محتاجه اهتمام وعنايه والا مش هيحصل تعافى حقيقى ..
احنا علينا مسئوليه تجاه جروحنا ،،
وبأمكاننا نسرع التأم الجرح ونقلل من العلامه اللى هيسيبها فى جسمنا
او اننا نهمل فى العنايه بجروحنا فالوضع يسوء والجرح تحصله عدوى وصديد وميلتأمش اصلا
او لو التأم بعد زمن طويل فيسيب علامه بشعه يمكن تحتاج جراحه تجميليه علشان تتشال ويكون شكل الجلد مقبول نوعا ما ...
اذا كنت تحتاج لمساعده (خياطه) اسرع فى طلبها من المختص ومتتكسفش تعلن الاحتياج ده للطبيب المعالج لان ده شغله اصلا ..
هيفرق معاك قوى فى النتيجه وشكل الجرح بعدين ..
متحاولش تلعب فى الجرح كتير ،،
كل ما بتفتح فى جرح قديم بتعرضه لاحتمال عالى للاصابه بالميكروب ويحصل صديد والدنيا تعك بعد ما كانت ماشيه كويس قوى .. ده غير انك بتبوظ كل مجهود الجسم فى انه يتمم عمليه الالتأم ..
الاهتمام بالجرح مش انك تفتحه كل شويه وتلعب فيه ده اسمه خراب وهينتهى بنتيجه وحشه .. خراج او علامه قبيحه
الاهتمام بالجرح يعنى تغير عليه كل يوم بمطهر وتتاكد من نظافته وان مفيهوش صديد وتلتزم بالمضاد الحيوى اللى بتاخده
اه صحيح ،،
لو فى خياطه متستعجلش وتفكها قبل اوانها .. انت كده كأنك معملتش حاجه وفتحت الجرح من تانى وعرضته للميكروبات وبوظت مجهود الجسم ...
اصبر على جرحك واديله فرصته فى الالتأم
مش محتاج فى الوقت الحالى غير انك تصبر وتغير عليه باستمرار وتتاكد من نظافته وتتغذى انت كويس علشان تساعد جسمك يبنى انسجه جديده ..
هيبقى سايب علامه بسيطه لو كنت حقيقى مهتم بنظافته وكانت الخياطه بتاعته معموله عند واحد شاطر وانت ملعبتش فى الجرح وحافظت عليه وعلى الخياطه فى مكانها ومستعجلتش فك الغرز قبل اوانها ...
وقتها هقولك مبروك انت خفيت ..
اما لو حصلت مضاعفات فهنتكلم عليها فى الموضوع اللى جاى ..
* التعافى موضوع كبير ومليان تلميحات و اخر كام فقره مليانين تجارب مش عارف اقولها صريحه ، هيفهمها بس اللى اختبر الكلام ده و اتعور قبل كده ..
