دايما Up-Regulated !

مسألتش نفسك فى مره ليه فى اوقات بيبقى عندك شوق قوى لربنا وانك تسمع صوته

 اوقات من ابسط مواقف فى الحياه تحس من جواك انها رساله ربنا ليك

واوقات تانيه مهما تقرا فى كلام ربنا او تصلى مبتحسش باى حاجه

 اوقات تبقى نفسك تقضى الليل كله صلاه وكلام مع ربنا واوقات تانيه بتكروت الصلاه فى  خمس دقايق وتطلع منها زى ما دخلت ..

فى حاجه زى كده بالظبط بتحصل جوه جسمنا

 تعالا نفهمها سوا علشان نعرف نعالج المشكله دى ازاى ..

انت عارف ان المخ علشان يخليك تعمل حركه معينه بيتطلب انه يبعت اوامر بالحركه لعضلات معينه ..
الاوامر دى بتتنقل عن طريق اشارات كهربائيه من خلال الاعصاب لغايه ما بتوصل للعضله اللى مطلوب انها تشتغل
والمنطقه اللى بيتلاقى فيها العصب مع العضله نفسها اسمها Neuro-Muscular Junction ومن معنى الكلام يعنى الوصله junction اللى بتربط العصب neuro مع العضله Muscular

فى المنطقه دى بيتم نقل الاوامر عن طريق مواد كيميائيه اسمها (Acetyl Cholin (A.Ch فالاشاره الكهربائيه اول ما بتوصل لنهايه العصب بتخلى نهايه العصب تفرز ال A.Ch فى الفراغ اللى بين العضله والعصب اللى اسمه synaptic cleft وهناك على العضله مستنياه مستقبلات مخصوصه ليه اسمها A.Ch Receptors واللى لما بيمسك فيها ال A.Ch بيدى الامر للعضله علشان تنقبض ..
ولأن مينفعش يفضل ال A.ch موجود فى الفراغ بين العصب والعضله ففى انزيم معين هو اللى مسؤل عن تكسير ال A.Ch اسمه (Acetylcholinesterase (A.ChE علشان العضله توقف عن الانقباض ..
فى حاجه بقى ..

ربنا ميز العضلات بخاصيه جميله اسمها Up-Regulation & Down-Regulation
يعنى ايه ؟
يعنى لما العضله تتعرض لل A.Ch بمستويات عاليه اكتر من الطبيعى ( معنى كده ان الانزيم اللى بيكسر ال A.Ch مش شغال ) بتقوم مقلله عدد المستقبلات اللى موجوده على سطحها اللى بيمسك فى ال A.ch فتقلل من مفعول ال A.Ch الزياده اللى موجود وده اللى اسمه Down-Regulation
وعلى العكس لو كميه ال A.Ch قلت قوى ( معنى كده ان الانزيم اللى بيكسر ال A.Ch شغال بزياده عن الطبيعى ) العضله بتقوم مزوده عدد المستقبلات Receptors اللى موجوده على سطحها علشان تكون حساسه لاى كميه ولو ضئيله من ال A.Ch فتستغلها وتشتغل بيها وده اللى اسمه Up-Regulation

طيب نطبق ازاى الكلام ده على حياتنا الروحيه ؟!
ركز معايا ..

كلمه ربنا هى واحده لكل واحد فينا وهى دى ال A.Ch
الكلمه دى المفروض تدخل جوا قلوبنا وتلاقى جوه قلوبنا المستقبلات المخصوصه ليها علشان تشتغل وتقدر تغير الحاجات الوحشه اللى جوانا وتعلمنا فضايل وحاجات حلوه تنفعنا باقى حياتنا
بس اوقات بتكون فى معطلات بتكسر كلمه ربنا قبل ما تتلامس مع قلوبنا وعلشان كده مبنتأسرش بيها ولا بتغير جوانا حاجه
المعطلات دى فى مثالنا هو الانزيم A.ChE) Acetylcholinesterase) اللى بيكسر ال A.Ch
المعطلات دى فى حياتنا كتير .. زى مثلا الهموم اللى بنشيلها على راسنا .. متاعب الشغل .. المشاكل .. الخطيه .. الشهوه .. الكسل
الى اخره من الحاجات اللى ما بتخليناش نقدر نستقبل كلمه ربنا جوانا

حبه بحبه لما كلمه ربنا تقل قوى ولان روحنا محتاجه قوى قوى لكلام ربنا قوم ال Receptors لكلمه ربنا بتزيد قوى جوانا ولما بنمنع المعطلات انها تتحكم فى حياتنا بنقدر نشوف كلام ربنا لينا حتى فى ابسط الامور لان قلوبنا دلوقتى حساسه قوى ومشتاقه قوى لكلام ربنا زى بالظبط لما العضله بتزود عدد المستقبلات على سطحها علشان تلقط ابسط كميه من ال A.Ch فتشتغل بيهم وده اللى سمناه ال Up-Regulation

طيب هتقلى امال ال Down-Regulation ده بيحصل ازاى فى حياتنا الروحيه ..
بص يا سيدى .. لما احنا نهتم بمظهر الفضيله من برا من غير ما يبقى بنعملها من قلوبنا ده بيولد جوانا الفتور .. يعنى تصلى بس كما لقوم عاده .. تصوم بس مش حاسس ببركه الصوم .. مجرد فرض ولازم تعمله .. كلمه ربنا بتقراها بسرعه وكروته ومبتستناش تاخد منها اى بركه او تعزيه .. فتقوم كل المستقبلات اللى عندك يقل عددها وتبقى مش مستجيب لاى A.ch فى حياتك لانك ملكش عمق وده اللى اسمه ال Down-Regulation او بمعنانا الروحى .. الفتور

ركز معايا فى الزتونه بقى ..
اهتم جدا بأنك تخلى قلبك حساس قوى لكلمه ربنا بانك متخليش اى معطلات او هموم بانها تسيطر على حياتك ..
اعرف ان الحقيقه الوحيده فى حياتك هى ربنا .. الباقى كله صدقنى الى زوال ..
اهتم بانك تقتل المعطلات اللى بتعطل كلمه ربنا من انها تشتغل فى قلبك .. خطيه او شهوه او مشاعر غريبه .. الخ
متسمحش لحاجه انها تحرمك من الوجود مع ربنا

وان كنت عايش فى فتور فاعلم ان ربنا مخلقناش نكون عبيد له .. ولا هدف ربنا من الوصيه اننا نطيعها بالحرف وننسى روح الوصيه نفسها ..
حاول تدخل للعمق مع ربنا فى كل حاجه بتعملها ..
قلل من الشكليات .. ربنا ما بيهتمش بالعدد لكن بالعمق ..
لو بتصلى 5 دقائق بس من قلبك لربنا احسن بكتيير من ساعات تقف فيها فى بيت ربنا وتتكلم عنه ولكنك من جواك ميت وملكش اى علاقه حيه بيه ..


خليك قلبك حساس لكل كلمه من كلام ربنا ..
وابسط حاجه فى يومك تقدر تاخد منها دروس تنفعك كل حياتك ..
خليك دايما Up-Regulated !