"فى ايه يا عم؟! انا جيت جنبك !"بنقول العباره دى كتير لما نلاقى حد متنرفز علينا من غير سبب واضح
اوقات مع صحابنا يكون الهزار العادى مصدر الم
واوقات كلام بسيط فى ساعه صفا يتعب اللى قدامك ..
كلامنا مفهوش غلط فى نظرنا ..
واحنا عارفين كويس اللى قدامنا وعمر ما الكلام ده ضايقه فى يوم
ولو جبنا حد يحكم ما بيننا هيقول لا الكلام متعب ولا فيه سبب يخلى اللى قدامنا يتعب منه !
بس هو اتدايق النهارده ..
بمكن بيتلكك .. يمكن مخبى حاجه .. يمكن بيستهبل !
مش عارف ..
عارف انه متالم بس مش عارف ليه وده بجد ولا استهبال
اللى قلته ده جزء من يومنا سواء فى صحوبيه او مع اهلك او شريك حياتك او حتى اولادك
ويمكن يكون فعلا تفسيره صعب بس تعالا اخدك معايا ليوم فى الاستقبال فى المستشفى
لانى بنفسي تلامست جدا مع الموضوع ده وحابب انقلك اللى اتعلمته ..
فكره ان العيان اللى قدامك مش مجرد عضمه مكسوره !
لكن سبب الكسر سواء كان خناقه مع حد او تعرض لاعتداء او حادثه بيفرق جدا
وخصوصا لو كان اعتداء من حد قريب زى الاب او الزوج فى احيانا كثيره
فالكسر مش مجرد عضمه لكنه كسر فى النفس ..
صدمه .. مشاعر بتغلى من الالم ... قدره تحمل ضعيفه جدا ....
عدم استيعاب للموقف .. خوف من المكان ومن المحيطين ..
وسط كل ده بيجى دكتور لسه مخلص ازازه البيبسي وبيضحك مع صحابه علشان حد قاله فى حاله جات ..
احنا بنتنقل من حاله روقان لقلب حدث كبير
وبنتنقل لمرحله الكشف على المريض علشان نعرف المشكله ايه ونحلها ..
كنت اوقات كتير بلاقى الام غير مبرره تماما ..
فى الفحص الطبي جزء منه اننا بنحس العضم ونشوف هو مؤلم ولا لأ
انا فى بدايه الكشف بحاول اكون Gentle جدا فى التلامس علشان لو فى الم ميكونش بزياده ..
بس اللى بيحصل بيكون شىء عجيب
مجرد التلامس البسيط مع الجلد بيؤلم المريض جدا
وده كان بالنسبه لى ملهوش اى تبرير او سبب
يعنى لو عضمه مكسوره المفروض تتالم لما اضغط على العضمه لكن مجرد تلامس بسيط لسطح الجلد السليم يؤلم .. طب ليه ؟!!
فى الاول كنت بعتبره دلع او افوره نفسيه بهدف جذب اهتمام الناس اللى مع المريض
لغايه ما قريت ال Convergence Facilitation Theory
ودى بتنص على ايه ..
ان ممكن مؤثر غير مؤلم يلمس جلد سليم وغير مصاب لكنه يسبب الم !!!
طب ازاى ؟!!
لا المؤثر مؤلم
ولا الجلد مصاب
ورغم كده بيكون الالم
وكان ده السؤال اللى بيوقفنى كتير .. منين جه الالم !
بتنص على ايه بقى ..
A collateral from the visceral afferent converges on the projection neuron, together with the cutaneous afferent, partially depolarizing the projection neuron so, A sub threshold stimulus (eg light touch) from the cutaneous neurons can produce an action potential
معناه ان وجود الم فى مكان ما فى الجسم بيزود من حساسيه اعصاب ومستقبلات الالم ناحيه المثيرات فى منطقه الجلد اللى بتاخد نفس التغذيه العصبيه بتاعت المكان اللى فيه الالم الاساسى
وبزياده الحساسيه اصبحت المؤثرات الغير مؤلمه للجلد الطبيعى مؤلمه بالرغم من ان نفس المؤثر (لمسه) على اى مكان جلد تانى مش هيكون مؤلم
وبالرغم كمان من ان الجلد نفسه مش مصاب او متعور لكن سليم بس بردوا بنحس بالم من مؤثر غير مؤلم
لان المشكله فى العضو اللى من جوه وفيه اصابه مؤلمه ادت لزياده حساسيه كل الاعصاب اللى ليها علاقه ببعض ..
انا عايز اوصل لايه معاك ..
وكون انك مش عارف او مش لاقى تفسير ده مش مبرر يسمحلك تتهم حد بالاستهبال او تقلل من المه مهما وصلت درجه علمك او خبرتك بالحياه ..
الحقيقيه انك لازم تحترم مشاعر اللى قدامك حتى ولو معندكش تفسير ليها
حتى لو كنت طبيب او خبير .. اوع تفتكر فى يوم انك بتملك كل الاجابات !
وان وقفت قدامك حاجه ، متستسهلش وتاخد اقصر طريق وترميها على اللى قدامك ..
اقف .. حاول تعرف ايه اللى بيألمه حتى ولو مش منطقى ومتعملهوش ..
مش لازم تفهم جذور الموضوع .. !
الحياه اكبر من انك تختبر كل حاجه فيها
وهتعدى عليك حاجات كتير انت مختبرتهاش او يمكن حتى متعرفهاش ..
اوع فيوم تاخد مكان ربنا وتحكم على حد بالسهوكه/الدلع/الاستهبال وتستكتر على بنى ادم وجعه ..
افتكر انك متعرفش
ووسع صدرك للمتألم
ومتخليش جهلك يكون سبب فى اذيه تانيه للى قدامك ..
دمتم معافين
معلومات اكتر عن الالم ونظرياته واسبابه هنا :
1- https://medatrio.com/pain-nociception/
2- https://www.physio-pedia.com/Referred_Pain
