اوقات وحشه سابت جوايا انطباعات مش حقيقيه انى مش مرغوب ومش محبوب
اوقات كنت بمسك الموبايل واقلب فى اسماء الناس
بسال نفسى مين دول ؟ وازاى بقينا بعاد عن بعض كده ؟
ازاى ممكن يعدى عليا وقت صعب وملاقيش حد الجأ اليه او اتكلم معاه
بصيت جوايا واخدت وقت هادى شويه
فافتكرت حقيقه طبيه فهمتنى قواعد كتير علشان مقعش فى المطب ده
احنا جسمنا فيه ملايين من الخلايا
الخلايا دى بتكون اعضاء
وجسمنا فيه اعضاء كتير جدا
وظائف الاعضاء دى مبنيه على بعض
يعنى ايه الكلام ده
ناخد مثلا الكالسيوم
احنا عارفين قد ايه الكالسيوم مهم جدا فى جسمنا
مهم لبناء العظام لانه مكون اساسى
ويمكن بعضنا ميعرفش لكنه هو مهم جدا فى عمل القلب والكهرباء بتاعته
ومهم جدا فى عمل العضلات وانقباضاتها وفى النهايات العصبيه وفى تجلط الدم كمان !
عنصر مهم جدا وتنظيم مستواه فى الجسم حاجه مهمه وفى منتهى الدقه
بيتدخل فيها اعضاء كتير قوى
فنلاقى ان الامعاء بتتحكم فى امتصاص الكالسيوم
ونلاقى ان الكلى بتتحكم فى اخراجه او المحافظه عليه
ونلاقى ان العضم بيستحدم الكالسيوم او يخرجه منه
الموضوع ده بيتم بواسطه تنظيم دقيق بقياده غده بتسمى الغده الجار الدرقيه
ازاى بقى ؟!
نقص الكالسيوم فى الجسم بيحفز الغده الجار الدرقيه انها تطلع هرمون اسمه PTH
الهرمون ده زى مرسال بيروح للامعاء يقولها زودى امتصاص الكالسيوم علشان قليل فى الجسم
ويروح للكلى يقلها قللى خروج الكالسيوم علشان محتاجين نحافظ عليه علشان قليل جوه الجسم
ويروح للعضم يخبط على الخلايا اللى بتكسر العضم ويحفزها تكسر العضم بزياده علشان يخرج كالسيوم فى الدم فيعوض النقص
طبعا الموضوع فيه تفاصيل كتير وكمان فيتامين د بيلعب دور مهم فى عمل هرمون ال PTH على الامعاء
ده مثال عن تنظيم نقص الكالسيوم بس .. متخيل التعقيد قد ايه !
جسمنا علشان فيه اعضاء كتير وكل عضو مختلف عن الاخر وليه وظيفه الاخر ميقدرش يقوم بيها
كان لازم يكون فيه "تواصل" قوى بين الاعضاء دى وبعض
يعنى الكلى لو مجالهاش هرمون ال PTH عمرها ما هتعرف ان نسبه الكالسيوم فى الجسم قليله وانها لازم متخرجهوش فى البول
طب ولو فيه مشكله فى الهرمون ده ..
الغده مثلا فيها مرض او المستقبلات اللى بتستقبل الهرمون ده بايظه يبقى عمر ما الكلى هتعرف
وبالتالى هينقص مستوى الكالسيوم جدا وده حاجه خطر
هرمون ال PTH ده واحد من هرمونات كتير بتفرز من غدد مختلفه واللى بيتحكم فى الغدد دى هى الغده النخاميه فبيسموها المايسترو بتاع الجسم وبيسموا الهرمونات المراسيل Messengers وبيسموا الموضوع كله النظام العصبى الهرمونى Neuro-Endocrine System والهرمونات دى وظيفتها تنسيق العمل بين الاعضاء المختلفه علشان يكون فيه بينهم تناغم او هارمونى ومن هنا جات تسميتهم بالهرمونات !
يعنى المقصود ايه
ان اختلافنا بيخلق ضروره ملحه للتواصل علشان نعرف نشتغل صح ونكون مرتاحين
احنا مختلفين جدا!
ده الانسان نفسه جواه فى اعضاء مختلفه ومحتاجه للتواصل بواسطه مراسيل ومايسترو يقودهم كلهم !
فما بالك بالانسان مع اخوه الانسان !
انك تقعد وتتكلم ده مهم قوى
وتتكلم باللغه اللى يفهمها اللى قدامك
يعنى فيه ناس ممكن تكون قريبه من بعض فالتلميح بيكون رساله وبتتفهم بوضوح
وناس ممكن تكون مختلفه فى طريقه التفكير او الثقافه فلازم رسالتى تكون واضحه للاخر
ومهم انى اطمن ان رسالتى بتوصل بوضوح !
سوء الفهم اللى بيكون موجود من قله التواصل بيخلق وسط سهل قوى فيه اننا نتعصب ونتخانق
وسط سهل فيه اننا نخسر بعض بسهوله قوى
وسط احنا فيه بنتعرض للاذى وممكن الاخر ميبقاش فاهم تصرفاتنا دى ليه
وقله التواصل من الطرفين معناها فى الاخر ان الجسور اللى بينهم بتتكسر وعلاقتهم بتموت
التواصل مهم قوى
وانك تعرف دماغ الاخر علشان تعرف تكون اتصال قوى ده تحدى حقيقي!
