"كلما كنت بمفردك كلما ازدادت سرعه خطواتك .."
فكره انتشرت فى زماننا تدعو الى الفرديه
وهى مشكله تواجه ثقافتنا العربيه ..
اى عدم القدره على العمل وسط فريق ..
ويمكن منقدرش ننكر قوه عمل الفرد بمفرده بعيدا عن تشويش المجموعه باختلاف وجهات نظر افرادها
ومنقدرش ننكر ان الانجازات بتكون فعلا اسرع وبالطريقه المفضله لك عندما تعمل منفردا ..
ولكن ماذا عن العمل الجماعى ؟!
الحقيقه ان هناك درسا خفيا وضعه الله داخل اجسادنا وفى الطبيعه يتناول هذا الموضوع بصوره فريده
معروف ان الناس ممكن تاخد ادويه كتير لعلاج مرض او شكوى ما ..
ومشهور جدا فى مجالنا السؤال بتاع
"يا دكتور يعنى الدوا ده يمشى مع دا ؟"
وده بياخدنا لانواع التفاعلات اللى بتحصل بين دواء ودواء اخر ..
قسموها فى العلم الى اربع تفاعلات ..
1- Antagonist
ودى الادويه اللى عكس بعض .. بيكسروا بعض .. او بيعطلوا كل واحد عن انه يعمل مفعوله
فلو حسبناها هنلاقى ان 5+6=4 !
واوقات تكون مدمره يعنى 5+6= -1 !
2- Summation
ودى الادويه اللى بتشتغل على اعضاء مختلفه ولكن بتؤدى الى نفس المفعول
فمن هنا جات كلمه summation يعنى الجمع اى 1+1 =2
3- Addition
ودى الادويه اللى بتشتغل على نفس العضو بنفس الطريقه لكن تركيب الدوا مختلف
فمن هنا جات كلمه Addition
يعنى بنضيف Add مفعول دوا على عضو معين مع مفعول دوا مختلف على نفس العضو
وبنفس الحسبه اللى فاتت 1+1=2
4- Supra Additive
ونقف هنا لان ده الدرس .. !
الادويه دى اضافتها مع بعض اكبر من جمعهم منفردين !
يعنى ببساطه 1+1= 6 !!
ازاى ؟!
الادويه دى ببساطه مش بس بتعمل شغلها لكن بتساعد الدواء اللى معاها انه يعمل شغله احسن ..
فليها اسم تانى Potentiateion
يعنى بتساعد وتحفز وتشجع الدواء الاخر على العمل
وان مفعوله يكون اقوى من كونه منفردا ..
وفى نفس الوقت هى كمان بتعمل دورها ...
اعتقد انك مستغربتش فكره ان تفاعلات الادويه مع بعضها جوه جسمنا مش بعيده كتير عن تفاعلاتنا احنا ناحيه بعض ....
الناس ممكن" تكسر مقاديفك" بالمصطلح ااشعبى المصرى .. ممكن تكون مؤذيه .. علاقات سامه .. علاقات اعتماديه ..
الناس كمان ممكن تكون بعيده وملناش دعوه بيها .. كل واحد بيعمل دوره فى الحياه بس مش بنتعامل سوا ..
الناس ممكن تكون معانا وبنعمل شغلنا سوا بس فى حدود ... كل واحد بيعمل اللى عليه وبس وملهوش دعوه بغيره
الناس ممكن تكون معانا وبنعمل شغلنا سوا وفى حدود بس احنا مش لوحدنا ..
احنا بنسند بعض وقت تعبنا ..
احنا بنشجع بعض ..
احنا بنساعد بعض نشوف نفسنا بطريقه احسن ..
بنساعد بعض على اكتشاف قدراتنا ..
بنؤمن ببعض وبان بالرغم من اختلاف شخصياتنا وادوارنا لكن مش معناه اننا نكون لوحدنا
الحقيقه ان النوع الاول من الناس احنا مش محتاجينه فى حياتنا
والبطوله بتكون لما بنتخلص من تأثير الناس دى وسمومهم اللى بينشروها جوانا ..
النوع التانى ده بنحترم وجوده ودوره وهو اساس المجتمع ..
اما النوع التالت واللى فيه الكثير من الفرديه فده اللى محتاجين نحوله للنوع الرابع ..
ان دماغنا متكونش بس منحصره فى انفسنا واللى علينا وبس ..
اننا نتعلم ننظر للاخر اللى حوالينا ونستفاد من القدرات والمميزات الى ربنا وهبه بيها
اننا نكون مؤثرين فى حياه الاخرين ونشجعهم يكونوا احسن ويعرفوا انفسهم احسن
وقتها كلنا هنستفاد من ال Potentiation اللى بنعمله مع بعض
ووقتها هيكون مجموع قوتنا مع بعض اكبر بكتير من محصله كل واحد بمفرده ..
متبقاش لوحدك وميغركش سرعه خطواتك .. فى النهايه ليك حدود وهتتعب ..
خلى معاك حد جنبك يشاركك طريقك .. بمكن يكون متعب ان يكون جنبك حد بافكار وشخصيه مختلفه
ويمكن بتكون محتاج تبذل مجهود كبير علشان تعرف تكون فى العلاقه وملتزم بواجباتها
ويمكن تكون عايز تحط المجهود ده فى طريقك ومصلحتك انت وشايف ان العلاقات تضيع وقت
لكن صدقنى الاستثمار فى العلاقات اثمن ..
والمجهود اللى بتبذله مع غيرك هيبقالك ..
وهيديك انك تكمل لمسافات ابعد عن لو كنت ماشى لوحدك ومجهودك لنفسك ..
دمتم سالمين :)
ممكن تقرا اكتر عن ال Drug Synergism من هنا :
