شبعان ؟

شبعان ؟
اكيد مش قصدى الاكل ولو ان الاكل مهم بردك
بس بجد شبعان ؟
ولا لسه محتاج ؟
شبعان حب .. اهتمام .. رعايه .. قبول !
ولا لسه بتدور لمعنى لنفسك وسط الناس ..
لسه بتشحت ومش لاقى حد يشبعك كلك ولا حتى يفهم احتياجاتك ..

عمال لامؤاخذه بترمرم ؟
شله، خروجات، مشغوليه، تلاهى، شهوه بطن، شهوه جسد، علاقات كتير، أدمانات مختلفه
وبعد كل ده تصرخ ..
لسه جعان !
كل ما تقعد مع نفسك متطيقهاش وتهرب منها ومن احتياجاتها ...

انا عاوز اتكلم معاك النهارده عن الشبع ..
على مستوى الخلايا الاول وبعد كده نحاول نشوف نقدر نتعلم منه ايه

الخلايا بتتواصل مع بعض عن طريق مواد كميائيه بتتفرز وتمسك فى مستقبلات على سطح الخلايا التانيه فتنقل ليها رساله معينه او تخليها تعمل عمل معين خاص بالماده دى ..


حاجه كده عامله زى القفل والمفتاح
كل قفل (مستقبل Receptor ) ليه مفتاح (مواد كميائيه Hormones & Neurotransmitters) خاص بيه

بس فيه بقي خصائص خاصه بالمستقبلات مش موجوده فى مثال القفل والمفتاح حابب اتكلم عن خاصيه واحده منهم اسمها
 Competitive Antagonist

ايه الخاصيه دى ؟ [1]
بيقولك ماده كميائيه X تمسك فى المستقبل علشان تعمل عمل معين
ايه ال Competitive Antagonist بقي

دى ماده Y تتنافس مع الماده X على نفس المستقبل بتاع x وتمسك فيه وتشله فالماده x ماتلاقيش اى حاجه تمسك فيها وتبقي مش فعاله ..

ناخد مثال عملى ركز فيه قوى من فضلك

لو مريض واخد جرعه عاليه جدا من الكوكايين Opiod وهيموت
لان الجرعه الزياده ماسكه فى مستقبلات معينه ومشغلاها جامد انها تقلل التنفس وتعمل حاجات تانيه تؤدى للموت
فيروح المستشفى بسرعه ..
قوم بسرعه يدولوا ماده نالوكسون Naloxone

الماده دى بتتنافس مع الكوكاين على المستقبلات اللى ماسكه فيها الكوكايين
قوم النالوكسون يطرد الكوكاين من المستقبلات ويمسك هو فيها ويلغى تاثير الكوكايين منها بل ويشلها
فيبتدى العيان يفوق

ويبقى الكوكايين الموجود فى الدم غير فعال لان النالوكسون اقوى منه وطرده من المستقبلات اللى كان ماسك فيها وكمان شل المستقبلات دى فمبقتش تشتغل وتأذى العيان زى ما كانت بتاذيه لما كان الكوكايين ماسك فيها .

عاوز اقولك ايه يا صاحبى ..

احنا مخنا ،، قلبنا ونفسنا وروحنا واجسادنا، مليانه مستقبلات كتير قوى
وطول اليوم المستقبلات دى مفتوحه ومشغوله باستقبال حاجات كتير فى يومنا
اوقات بنبقى شاغلين كل حواسنا بحاجات مفهاش شبع حقيقى بل ممكن تكون مميته
بس ..
اهى شغلانى ..
شغلانى عن جوعى الحقيقي ..

جوعى لله !

اهو ملهى ومشغول والمهم انى مشغول وبنسي ..
بشبع باكل او بعاده جنسيه او بخروجات زياده او باصحاب 24 ساعه
خايف اقول مشغول بخدمه او نشاط عن ربنا
مشغول باداريات ، بعلوم، بثقافات ، بماجستير ودكتوراه
حتى مشغول بالاهل، اب ام اخ اخت ابن ابنه زوج زوجه بيت عيله تواصل ..

فى حاجات كتير من اللى فوق طبعا مش غلط بس الفكره انا بستخدمها ازاى

لو حاسس انك مهدود وكل مستقبلاتك مشغوله بحاجات مش مشبعه ومش هادفه
لو حاسس انك جعان ومش لاقى معنى للحياه
اهرب اللى الله والى كلمته

الله وحده اللى Competitive Antagonist مع اى حاجه فى العالم
هو يقدر يطرد اى ماده او شهوه او مشغوليه لاهياك ومشغلاك زى العبد

الله وحده يقدر ينقذ حياتك ومهما كانت المشغوليه فى حياتك عمرها ما تقدر تلمس مستقبلاتك لانها شبعانه بربنا
يقولك النفس الشبعانه تدوس العسل
اللى شبعان بربنا وربنا ماسك فى كل مستقبلاته عمر ما حاجه تقدر تدخله تلهيه عن ربنا
واللى تعبان من حاجه او حاجات لاهياه عن ربنا
بقوله امسك فى ربنا وكلمته
الله قوى كفايه انه يقدر يطرد من قلبك وحواسك كل حاجه غلط

الله قادر يتنافس مع اقوى الحاجات اللى مسيطره عليك وفى ثوانى يخليها غير فعاله

الله وكلمته اقوى من اى حاجه فى العالم

راجع:
====
[1] https://en.m.wikipedia.org/wiki/Competitive_antagonist