اعتقد ان معظمنا مبيحبش يحس انه تقيل على حدحتى فى مشاكلنا .. مبنحبش نعمل منها ازمه كبيره
حتى لما بتكون مشاكل كبيره .. ممكن نرفض حتى المساعده !
انا هبقى تمام .. انا مش محتاج لحد
محدش هيفهمنى او يستوعب احتياجاتى
انا حابب اتكلم النهارده عن عمليه ابتدينا نسمع عنها كتير فى زمننا ده
وهى نقل الاعضاء ..
اشهرها الكبد والكلى ولكن طبعا فيه القرنيه والقلب واعضاء اخرى بتتنقل ..
وعمليه نقل الاعضاء من انسان/متوفى الى مريض عمليه معقده للغايه
بتحتاج توافر شروط كتير ابسطها توافق فصيله الدم ولكن مش ده بس
فيه اجسام مضاده كمان جوه الدم بنحتاج انها تكون متوافقه ..
فيه اشتراطات فى اللى هيتبرع وكمان توقيت وطريقه اخذ الاعضاء باحترافيه للحفاظ على حيويتها !
فيه اشتراطات فى المريض اللى هيتلقى العضو كصحته العامه وانه مش بيشرب خمور او عنده اسباب قد تؤدى الى تلف العضو مره اخرى
بس فيه شرط لفت انتباهى
ان المتلقى للعضو يكون عنده نظام دعم نفسي مستقر ومعروف !
فى البدايه مكنتش فاهم ولا مقتنع ..
يعنى انا ممكن اموت وميتنلقيش عضو انا محتاجه جدا علشان معنديش دعم نفسي !!!
يعنى عمليتى ممكن تتلغى وتتاجل لغايه ما يكون عندى نظام دعم نفسي !
حسيته تهريج الصراحه ..
الدعم النفسى اه مهم بس مش قوى كده
فى منظمه مشهوره جدا لتنظيم نقل الاعضاء بالخارج اسمها UNOS ودى اختصار ل "United Network for Organ Sharing" بتقول بوضوح ان اللى بيقدم الدعم والرعايه للمريض هو اساس نجاح عمليه النقل
"Caregivers are key to transplant success"
https://transplantliving.org/before-the-transplant/caring-for-transplant-patients/
وعلى موقع مختص بعمليات زرع النخاع بيقول ان معظم المراكز اللى بتخدم الخدمه هترفض انها تعملها لو المريض ملهوش دعم نفسي واضح
Most transplant centers will not allow a patient to go forward with a transplant unless a dedicated caregiver has been identified
https://www.bmtinfonet.org/transplant-article/role-family-caregiver
وكلا الموقعين بيتكلم بتفاصيل شديده عن اهميه مقدم الدعم Caregiver وبيتكلموا عن دوره بالتفصيل قبل وبعد الجراحه والتحديات اللى بيواجهها وازاى يتغلب عليها وازاى يحافظ على نفسه علشان يعرف يقدم دعم صح
طبعا النقطه دى الحديث فيها يطول جدا ..
وكلا الموقعين السابقين اتكلم عن التفاصيل دى بدقه فلو مهتم تعرف دورهم انصحك تقرا اللينك اللى فوق ..
السنه اللى فاتت "2018" تم نشر ورقه بحثيه مش عن نقل الكبد ولا عن مرضى الكبد ولكن بحث يخص فقط مقدمى الدعم للمرضى اللى بيتنقلهم الكبد من كتر اهميه دورهم والتحديات الكتير اللى بيواجهوها
ممكن تاخد فكره عنها من هنا :
فقد ايه نجاح عمليه متوقف على الحصول على الدعم والاهتمام ..
الموضوع ده بينورلنا فكره ان مش كل حاجه الانسان بيعرف يعملها لوحده ..
ان فى تجارب او ضيقات اكبر من طاقتنا اننا نتحملها لوحدنا ..
حتى هما كاتبين لو ملكش حد يقدملك الدعم ده فى عيلتك،
دور فى قرايبك،
ولو ملقتش دور فى اصحابك،
ولو ملقتش ففيه ناس متخصصه بتقدم الخدمه دى ..
القصد انك متتكسفش تقول انا محتاج مساعده ..
ولو انت لوحدك لازم تدور على الدعم وهتلاقيه صدقنى ..
لكن متستسلمش لفكره ان محدش فاهمك او انك هتقدر تعدى فى ده لوحدك ..
اتكلم هتلاقى ناس زيك ومستعده تساعدك ..
