اللقاء الثانى

هو انا ليه مش بتعلم من اخطائى ؟
كل مره نفس الغلطه ؟ هى هى ؟
هو انا غبى فعلا و مبفهمش ... هفضل طول عمرى كده اكرر نفس الغلطه
شكلها كده كده مفيش منها فايده .. 

بص طيب معايا حبه كده وانت هتفهم حاجات كتير ..

انت عارف جهاز المناعه فى جسمنا بيشتغل ازاى ؟
تعالا كده اديك فكره بسيطه عنه
جهاز مناعتنا بيتكون من شقين اساسين كل واحد ليه وظائف غير التانى بس كل واحد فيهم بيكمل التانى وليه علاقه بيه ..
اسمهم Humoral و cell mediated
بص انا هتكلم فى حاجات بسيطه جدا جدا من جهاز المناعه ..

بص يا سيدى .. لما بيجى ميكروب يهاجم جسمنا لاول مره .. جسمنا بيلاقى حاجه كده مميزه لكل ميكروب اسمها antigens..
و طبعا لان جسمنا اول مره يشوف الميكروب ده فهو اول مره يشوف ال antigens دى
فبيبتدى يتعرف عليها عن طريق خلايا معينه اسمها virgin B cells ...
ولو تلاحظ معايا كلمه virgin يعنى عذراء لان الخلايا دى اول مره تتعرف على ال antigens الغريبه دى

طيب مهمه جهاز المناعه ايه ؟

انه يصنع اجسام مضاده Antibodies مخصصه لل antigens دى ..
بس لان دى اول مره جهاز المناعه يشوف ال antigens دى فبيبقى رد فعله بطىء قووووووى و غالبا مبيبقاش مفيد بحاجه !!

بس بعد ما الانسان بيخف من الميكروب ده بتتكون عنده حاجه اسمها Memory B cells
من اسمها كده .. بتبقى حافظه شكل الميكروب ده كويس قووووووى و بتفضل عايشه فى جسمنا فترات طويله جدا

تعرف .. اول ما بيجى الميكروب ده نفسه تانى يهاجم جسمك .. ال Memory Cells بتتعرف على ال Antigens اللى موجوده على الميكروب و لانها عارفاها كويس فبتبدا بسرعه جدا تنشط جهاز المناعه علشان يعمل اجسام مضاده ..
الاجسام المضاده دى بتكون غير اول مره .. اعدادها كتير قوى و قويه جدا .. بتقوم تمسك فى الAntigens اللى على الميكروب
ومن الاخر كده بلغتنا " بتثبت " الميكروب وهاتك بقى فيه ضرب ومعركه معاه لغايه ما يموت خالص و بتيجى خلايا تانيه كمان من جهاز المناعه وتاكله هم هم هم
من الاخر كده .. الميكروب ده مش هيعرف يهاجم جسمك تانى 

جسمك حفظ شكله واول ما بفكر يدخل جسمك يتكون دى نهايته

طيب امال ايه حكايه التطعيمات اللى احنا بناخدها ؟

التطعيم ده بيكون غالبا عباره عن ميكروب معين ميت او مشلول او حتى السم بتاعه .. بنحقنه فى الجسم علشان الجسم يشوف ال Antigens اللى عليه فيكون ليها Memory Cells  و لان الميكروب اللى بنحقنه بيكون ميت او مشلول فمش بيضر جهاز المناعه خالص ..
لكن لما بيجى بعد كده الميكروب القوى الاصلى يهاجم جسمك بعد التطعيم .. جسمك علطول بيشوف نفس ال Antigens فبيقفشه و بال Memory Cells اللى اتكونت بعد التطعيم بيتم تصنيع الاجسام المضاده و تهاجم الميكروب وبكده سعادتك متعياش من الميكروب القوى ده .. لان جسمك كان واخد معلومات عنه قبل كده فى التطعيم ..

لو حابب تشوف الفديو ده هيشرحلك اكتر :  دوس هنا

انا عارف انه موضوع تقييييل قوى و زمانك زهقت منى
بس لولا انه مهم جدا مكنتش فكرت انى اشرحهولك كده

ركز كده معايا علشان الزيتونه هنا هو

انت عارف  كلمه Antigens دى اتكررت كام مره ؟
9 مرات سعادتك
واخد بالك قد ايه مهم انك تتعلم ازاى تعرف عدوك وتميزه لما يجى يهاجمك و تحدد اسباب وقوعك فى الخطا اول مره ..

من المهم جدا جدا كمان انك تدرس الخطا فى كل مره تغلط فيه لان بتكون فيه نقط ضعف عندك انت مش واخد بالك منها ومحتاج جدا انك تدرسها و تعرف اسبابها و ازاى تتجنب الوقوع فيها مره اخرى ..

خليك ذى جسمك كده شاطر
اذا كان جهاز مناعتك اللى جواك يقدر يعمل كل الليله دى وهو متبرمج كده
فما بالك بانت اللى ربنا مديك عقل تقدر بيه تحلل و تفكر وتتعمق و تبحث عن حلول و تعلم نفسك ازاى متكررش غلطك
مفيش حاجه اسمها انا فاشل و انا بغلط نفس الغلطه ..
انت تستطيع وبداخلك جسمك ايضا بيعمل كده كل يوم

اتعلم كمان من التطعيمات
انت بالبحث و القراءه و المعرفه تقدر تتعلم دروس كتييير اوى فى حروب انت مخضتهاش اصلا
فلما تيجيلك نفس الحروب او الظروف لاول مره انت بتكون قريت عنها قبل كده
عارف اسبابها .. عارف مخاطرها .. عارف ازاى تحمى نفسك منها 
اللقاء الاول لك مع هذه المشكله كان بالمعرفه و القراءه والبحث
فعندما جاء اللقاء الثانى كنت مستعدا ..

اللقاء الثانى دائما هو التحدى لما تعلمته من اللقاء الاول
هو اختبار لمعرفتك الاولى ومدى استفادتك منه
لا تضيع خبرات اللقاء الاول هباء !

معلومات طبيه اكتر هتلاقيها هنا :
http://www.uptodate.com/contents/the-humoral-immune-response
http://www.youtube.com/watch?v=G7rQuFZxVQQ
http://www.youtube.com/watch?v=Nw27_jMWw10&feature=related