قلب واحد لا يكفى

اصبحت الحياه مجرد خطوات بمشى عليها كل يوم ..
حبه صلاه على مذاكره على شغل او كليه وترجع البيت مهدود تريح حبه وتنام وتصحى علشان تكرر نفس المنوال !
طب تعرف ان اكتر ما يقتل جسدك ونفسك وروحك الثلاثه هو الدخول فى هذه الدائره المظلمه .. الروتين
يمكن تكون فاهم ان الروتين بيأثر على نفسيتك ويخليك حتى مش طايق انك تعمل اللى عليك من كتر ما انت زهقت منه ..
بس جسدك و روحك .. دول مالهوم ومال الروتين ؟!!

تعالا احكيلك يا سيدى ..
انت عارف ان جسمك ده عباره عن شعله من النشاط فيه خلايا بتشتغل وتصنع بروتينات وتهضم جلوكوز وتصنع مركبات طاقه ATP علشان جسمك يعرف يشتغل ويتحرك ..
و فيه الدم كمان نشيط جدا بيدور على جسمك كله بعد ما يتضخ من القلب علشان يدى كل خليه من خلاياك احتياجاتها من الغذاء و ياخد منها الفضلات علشان ينقلها للكبد او الكليه واللى بدورها بتطردها بره الجسم ..

بس تعرف ان جسمك فيه اكتر من قلب !

ايوه بجد مش بهزار حتى بيسموهم Peripheral Heart ودى عباره عن عضلات قويه موجوده فى سمانه الرجل Calf Muscles اسمها soleus, medial and lateral gastrocnemius muscles  وظيفتها انها تعصر الدم اللى موجود فى الاورده اللى فيها علشان ترجعه مره تانيه للقلب ومن القلب للرئه وياخد اكسجين ويطرد ثانى اكسيد الكربون ومن الرئه للقلب مره اخرى ليضخ لكل الجسم وهكذا ..

طيب تخيل كده معايا لو ان ال Peripheral Heart  ده مش موجود يعنى مثلا واحد بيقعد فى البيت من غير ما يتحرك او رجله مكسوره او ظهره بيوجعه فقاعد فى السرير على طول وخصوصا كبار السن او لو حد عامل عمليه و قاعد فى السرير فتره طويله ..

ببساطه الدم بيبقى ماشى ببطء جدا و بيتجمع فى الرجلين ومع الحركه البطيئه ليه بتبتدى تتكون جلطات Emboli فى اورده الرجل ودى حاجه خطر جدا لانها لو انفصلت ومشيت الجلطات دى فى الدم هتروح لاى وعاء دموى صغير فى سكتها وتسده وغالبا بيكون الرئه وبيحصل انسداد رئوى Pulmonary Embolism يعنى اجزاء من اورده الرئه بتتسد بالجلطات Embolus القادمه من الرجلين وده بيخلى وظائف الرئتين وحشه جدا ده غير انه بيأثر على القلب ..

وعلشان كده الدكاتره لازم بتدى لاى من الحالات السابقه مسيلات دم علشان تمنع حدوث الجلطه نتيجه للقعاد فترات طويله فى السرير ..
لكن لما بتكون نشيط وبتتحرك وتتنطنط الدم بيبقى بيجرى فى عروقك ويضخ عن طريق عضلات رجيك للقلب تانى وميتسابش ابدا فى مكانه ولا يسمح ان جلطات تتكون ابدا ..


نفس الحكايه كمان فى حياتك الروحيه ..
ركز كده معايا ..
انت دايما محتاج نشاط فى حياتك الروحيه والا هتقع فى الفتور .. يعنى بتصلى وبتقرا فى الكتاب وملتزم ومواظب على الصوم والتناول والاعتراف لكن كله ملهوش طعم .. مجرد روتينيه بدون احساس ..

لازم فى كل ممارسه روحيه انت بتعملها تاخد من ربنا حاجه جديده .. بركه او نعمه او تامل او فرح او او ... لازم تتطلع من وسائل النعمه شبعان ولازم كمان تتعود انك تخرج الحاجات اللى ربنا بيديهالك دى عن طريق الخدمه فيرجع ربنا يديك حاجات جديده انت اول مره تشوفها وانت بدورك تدى اخواتك وهكذا .. مفيش كسل ولا روتينيه ولا ملل ولا فتور فى الحياه الروحيه !


الروح مثلها مثل الجسد والنفس لو مكنتش بتشغل القلبين بتوعك الدنيا هتقف والجلطات المميته هتبتدى تتكون ..
تعود دائما ان تاخذ من الله وتعطى اخوتك
قلب يضخ الدم وقلب يرجع الدم الى القلب الاول ليضخ مره واحده ..

قلب واحد لا يكفى !

معلومات طبيه اكتر هتلاقيها هنا :
http://www.hearthealthywomen.org/cardiovascular-disease/featured/deep-vein-thrombosis-dvt-pe.html
http://www.merckmanuals.com/professional/cardiovascular_disorders/peripheral_venous_disorders/deep_venous_thrombosis_dvt.html