القانون الاول !

تفتكر كده معايا ايه اول قانون الهى فى الخليقه ؟

تعال معايا لواحده من اعرق مكتبات الولايات المتحده وهى مكتبه الكونجرس الامريكى .. ففى وسط المكتبه العظيمه دى على الجدار الشرقى فى المنتصف متعلق لوحه بالمقوله دى :

        ,,ORDER IS HEAVEN'S FIRST LAW’’

معناه ان النظام هو القانون الالهى الاول !

 http://www.loc.gov/loc/walls/jeff2.html

كتير مننا فى مصر سمع عن مرض التليف الكبدى liver cirrhosis اللى متصاب بيه كتير من المصريين نتيجه البلهارسيا وفيرس بى و سى كمضاعفات للامراض دى

بس اللى كتير منكم ميعرفهوش هو ان المرض ده عجيب قوى قوى قوى

ازاى يعنى ؟

بص معايا الاول فى الصوره دى .. ده شكل الكبد السليم .. شايف فى الرسمه المبسطه دى ازاى خلايا الكبد مترتبه فى اماكنها  بنظام  معين وجميل قوى

وللاسف نتيجه امراض مزمنه كتيره خلايا الكبد بتموت بس هنا المفاجاه ..

خلايا الكبد لها قدره هائله جدا على تجديد نفسها يعنى تقدر تنتج لوحدها خلايا جديده ..
خد طيب معلومه كده على جنب .. لما حد بينقولوله كبد هما بينقولوا فى الواقع فص واحد من الكبد وهو بنفسه بيشتغل سواء فى جسم المتبرع اليه او باقى الكبد فى جسم المتبرع نفسه وبيكون خلايا جديده لغايه ما يبقى ذى الكبد الطبيعى تمام  فى عده شهور بس بشرط يكون الكبد سليم ومفهوش امراض طبعا..

نرجع لموضوعنا .. امال لما خلايا الكبد بتعرف تتوالد وتكون خلايا جديده regeneration  امال فين المشكله ؟!!

المشكله ان الكبد بيحصل فيه تليف .. يعنى ايه ؟ يعنى بيفقد المنظر الجميل اللى شوفته فوق ..
فى الرسمه اللى جنبك دى .. ده كبد متليف شايف الخط الاخضر ده هو اللى بيحدد مجموعات الخلايا عن بعض ..
ملاحظ الفرق بين الرسمتين !
فرق شاسع جدا ..

بتلاقى خلايا ميته و مجموعه خلايا لسه متكونه جديد كله متنتور فى اى حته ..
كله عشوائيه بشكل يقرف ..

ركز معايا كده ...
صحيح الخلايا الجديده سليمه وشغاله طحن وزى الفل
لكن .. علشان النظام اللى ربنا خلقه ليها مش موجود فبتفشل ..

العشوائيه اللى بتكون فيها الخلايا مش بتسمح ليها انها تشتغل خالص !!

رغم انها خلايا جديده وزى الفل ...
لكنها مستحيل تنفع وتقضى وظيفه الكبد ..

وعلشان كده معروف جدا ان مع تليف الكبد يدوب كام سنه والعيان بيجيله فشل كبدى !
عشان ايه ؟! علشان بس بس بس النظام ..
ايوه اصل حقيقى النظام هو القانون الالهى الاول !

هكذا انت يا عزيزى .

لو كنت حتى بتبذل كل جهدك لكن مش بنظام عمرك ما هتطلع فائده ذى ما بيطلع اللى بيشتغل اقل بس منظم ..
اشتغل دايما بنظام فى حياتك ..
اتعلم ترتب افكارك .. ترتب اولوياتك .. ترتب حتى احتياجاتك ...
فكر كويس
متعيشهاش بعشوائيه !

معلومات طبيه اكتر عن الموضوع ده هتلاقيها فى :
http://www.medicinenet.com/cirrhosis/article.htm

http://www.siumed.edu/~dking2/erg/liver.htm