خليك طحال على نفسك

وسط سرعه حياتنا وانشغالنا بهموم و احتياجات كتير فى يومنا...وسط لخبطه و لهوجه وعدم تركيز ...بتيجى لحظه صدق كده ...بقف فيها مع نفسى ! ..اكتشف ان فى حاجات كتير جوايا اتغيرت ..اكتشف انى بعدت عن هدفى فى الحياه..عن الخط اللى انا ماشى فيه..عادات كتير غريبه دخلت جوايا وانا مش واخد بالى منها....

من احد الاعضاء المميزه جدا فى جسمنا هو الطحال Spleen
ناس كتير متعرفش وظائف الطحال ايه فى جسمنا ؟
ايه هيحصل لو مفيش طحال ؟
انا اسمع ان الكبد مهم جدا و الكليه كمان .. بس الطحال .. ايه ده ؟



الطحال ليه وظائف كتير جدا ومهمه فعلا بس النهارده هندخل فى العمق جوه وظيفه واحده
اسمها الفلتره !

يعنى ايه ؟

يعنى كرات الدم الحمراء اللى بتشيل الاوكسجين والغذاء لجسمنا بيبقى ليها مده صلاحيه وهى 120 يوم بعد كده بتموت
و النخاع اللى فى العظم Bone Marrow بيكون كون كرات دم تانيه جديده ..
الطحال بقى بيفلتر كرات الدم الحمراء .. اى كره يلاقى عليها علامات الشيخوخه و انها خلاص هتموت يمسك فيها وياكلها هو ويدمرها بنفسه..
حاجه تانيه اهم بصراحه ...
لو فى اى اى مشكله فى كره الدم الحمراء بالذات شكلها لانه مهم لوظيفتها فحتى لو كانت خلايا جديده بيدمرها هى كمان ..

يعنى هو كده واقف ذى المراقب على مجرى الدم .. اى كره حمراء تعجّز ولها تتشوه بدون اى استثناءات بيدمرها ..

طيب ركز بقى معايا كده حبايه ..

طيب اذا كان جسمك بيعمل كده علشان يضمن ان كل كرات الدم الحمراء الموجوده  فى جسمك نشيطه وسليمه وذى الفل وبتقدر تعمل كل وظايفها بقوه وحيويه
ما تتعلم انت كمان منه ...
كل يوم فى نهايته اعمل نفسك يا عم طحال ! ..
راجع افكارك تصرفاتك طريقه تفكيرك فى اليوم ده ..
اى حاجه تلاقيها دخلت غلط او عملتها وانت مكنتش بتعمل كده
اى انحراف ولو بسيط علطول اقف مع نفسك وارجع لطريقك اللى انت كنت ماشى فيه ..
ببساطه ..
لانك لو سبت نفسك كده للحياه من غير ما تعمل نفسك طحال عليها
هتلاقى نفسك فى النهايه انحرفت بس مش مجرد انحراف بسيط و يتصلح
لكنه تراكمات انحرافات كثيره بدون مراقبه يعنى انحراف كبير جدا
قد او قد لا تقدر وقتها انك ترجع لمكانك وطريقك الاساسى

خد بالك وصحصح كده لحياتك
خليك طحال على نفسك !

معلومات طبيه اكتر هتلاقيها هنا :
http://www.livestrong.com/article/128821-four-functions-spleen/
http://www.thebody.com/content/art1788.html
http://www.jaapa.com/overwhelming-postsplenectomy-infection-managing-patients-at-risk/article/140089/