ترتيب الامور وتسلسلها مهم جدا ..
اوقات كتير بيبقى عندما شوق كتير اننا ننط على التسلسل ده ونطنش بعض الخطوات علشان نوصل للنهايه الجميله بسرعه ..
خطوات بنلخبطها ونقول مش مهمه ..
المهم الهدف ..
صوره جميله من الحكايه دى موجوده فى جهازنا الهضمى ..فى انزيمات معينه بتتفرز جوه الجهاز الهضمى ومهمتها انها تهضم البروتينات والسكريات والنشويات وتحويلها الى صورتها الاوليه علشان تمتص بسهوله وتوصل لكل خلايا الجسم بصور سهله تقدر تتعامل معاها سواء تحرقها لانتاج الطاقه او تخزنها فى صوره دهون ..
و من احد اهم الغدد اللى بتفرز الانزيمات دى وبتلعب دور اساسى فى عمليه الهضم هو البنكرياس ..
يس خد بالك لحاجه ..
البنكرياس نفسه عباره عن خلايا فيها بروتينات فاذاى هو يفرز انزيمات تهضم البروتينات من غير ما تضر خلايا البنكرياس نفسه ؟!
اللى بيحصل ان الانزيمات بتفرز بصوره خامله من البنكرياس ولا تنشط الا باختلاطها بالعصاره الصفراويه اللى بتيجى من المراره وبعض الانزيمات الموجوده فى جدار الامعاء فتتحول تلك الانزيمات الخامله الى انزيمات نشطه جدا وتهضم الطعام على اشكاله من بروتين وسكريات ونشويات ..
لما بتيجى حصوه وتسد مخرج الانزيمات دى common bile duct stone العصاره الصفراويه بتلاقى السكه مسدوده فبتروح على البنكرياس .. السكه الغلط اللى مش طبيعى انها تمشى فيها ونتيجه لذلك بتتنشط الانزيمات وهى لسه خارجه من خلايا البنكرياس وده بيؤدى لالتهابات شديده جدا فى البنكرياس و زى ما بيقولوا كده بيبدأ البنكرياس ياكل فى نفسه بالانزيمات اللى طالعه منه Auto digestion ..
من هنا نعرف ان الترتيب فى حياتنا مهم جدا .. الموضوع مش مجرد خطوات ومراحل لازم نعدى بيها وبس لكن الخطوات دى كلها مبنيه على بعض وعلشان كده لما بنستعجل ومش بنصبر على الوصول للهدف بتاعنا وبنتحايل باى شكل علشان نتجنب " بعض" الخطوات اللى فى فكرنا احنا انها غير ضروريه وتجاهلها مش بتأثر علينا فى حاجه بنلاقى ان الدنيا اتلخبطتت اكتر واللى كنا فاكرينه هيودينا اسرع لهدفنا توهنا اكتر ..يعنى من الاخر لكل شىء وقت .. امشى فى سكتك طبيعى و عدل .. لا تتسرع ولا تتباطأ ..
مفيش احلى من انك تعمل كل حاجه فى وقتها الصح و حسب ما رسمها ربنا..
معلومات طبيه اكتر هتلاقيها هنا :
http://www.vivo.colostate.edu/hbooks/pathphys/digestion/pancreas/exocrine.html
http://www.virtualmedicalcentre.com/diseases/pancreatitis-acute/179
