الدلائل والعلامات "Signs"

احبائى
بالرغم من ان الصراحه حلوه
وان الكلام المباشر بيوصل هدفه بصوره اسرع واوضح ..
وبالرغم من الحياه مش محتاجه كلكعه
وكلنا بنحلم نعيشها .. "ببساطه"
لكن عمق الحياه ومعانيها بيفرض علينا واقع لا هو بسيط ولا سهل زى ما احنا بنتمنى ..

كلنا نفسنا نعيشها ببساطه وسهوله لكن ما بيحصلش،

حتى مع ربنا ..

اوقات كتير بنتلغبط فى سماع صوته
ونقول ياليته يكلمنا بطريقه مباشره وواضحه

ودايما السؤال المشهور

كيف اسمع صوت الله او كيف اعرف مشيئه الله

الم يكن الله بالاولى ان يكون صوته واضح وصريح بما لا يقبل الشك ؟ ..

تعالا نشوف لما ربنا صمم اجسادنا كان فكره ازاى ، 

ممكن وقتها نفهم جزء من طريقه عمل الله الطبيب الحقيقي معنا 

وازاى نقدر احنا كمان نتعامل مع بعض ..

سنه خامسه طب كانت اول سنه اكلينيكيه بالنسبه لنا كطلبه فى طب

و كانت اول مره نمسك فيها سماعه ونحس فيها بطن العيان ونكشف

اول مره نتعلم نسمع القلب والصدر

نتعلم فيها ازاى نقيس نبض العيان وضغطه ..

الحقيقه اننا كنا بنحس ان الدكاتره بتتكلم عن "اوهام" ..

فكم المعلومات الهائله اللى كان الدكاتره بتطلع بيها من لمسات بسيطه للمريض مكنش يتصدق !

وكل ده من غير ما المريض يتكلم او يحكى مشكلته !

العلامات الحيويه

(النبض، الضغط، درجه الحراره)

النبض مثلا اللى بيظن العامه انه مجرد بشوف نبضات وابص فى ساعه

لكن الحقيقه لمسه الايد دى فيها مهاره خاصه من طريقه المسك والاحساس بالشريان و بتخرج من المريض 10 معلومات مختلفه ومهمه جدا

فمش معنى ان فيه نبض يبقى خلاص
لكن انتظام النبض من عدمه 
وقوه النبض 
وعدد النبضات 
وتساوى النبض على الناحيتين 
والفرق بين النبض فى الطرف العلوى والسفلى 
وطبيعه جدار الشريان 
والامراض المتميزه للنبض الى اخره من معلومات قيمه جدا 
لا يمكن ان يحللها ويخرجها احد من تلامسه مع رسغ المريض الا اذا كان خبيرا فى هذا ومتدربا تدريبا جيدا على التقاط كل هذه المعلومات.

كما ان مزج المعلومات اللى بتخرج من الثلاث نقط (ضغط ونبض ودرجه الحراره ) بيدى فكره مهمه جدا عن مدى استقرار المريض من عدمه او احتياجه لانعاش قلبى رئوى وده ممكن بينقذ حياه المريض وهو فى غيبوبه او فاقد الوعى ولا يقدر ان يتكلم او يساعدنا فى تشخيص مرضه ..

لو اخدنا كمان السماعه 

فالطبيب مش مجرد بسمع بيها صوت القلب وخلاص

لكن كل مكان فى القلب ليه صوت مميز جدا ولما بيحصل امراض فى القلب بيمكن تشخيصها من اختلاف الاصوات دى او ظهور اصوات جديده ومهم جدا كطبيب تعرف بتحط السماعه فين ومتوقع تسمع ايه وتعرف تحلل اللى بتسمعه وتخرج منه بالطبيعى واللى مش طبيعى وتعرف تحلل المش طبيعى علشان تقدر تقول ان المريض غالبا هيكون عنده كذا !

حتى صوت دخول الهواء فى صدر المريض بيتسمع فى اكتر من مكان وفيه اكتر من صوت وكل مرض بيعمل صوت معين سواء فى الشهيق او الزفير ومطلوب منك كطبيب انك تعرف تميز كل ده وتخرج باحتمالات قريبه جدا من الصح تساعدك مع التاريخ المرضى فى تشخيص العيان ووصف العلاج اللازم له 

طبعا مكنش ده سهل ابدا على واحد ممسكش سماعه قبل كده

ظننا فى الاول انهم بيضحكوا علينا

او انها كانت مجرد تهيئات

لكن مع مرور الوقت والتدريب ليل نهار على محاوله التقاط الاصوات الطبيعيه

وتدريب الاذن على التمييز بين الطبيعى والمش طبيعى

وتمييز الاصوات المش طبيعيه بانواعها وتحليلها

ابتدينا نميز ..

وابتدينا ننبسط قوى بصراحه ..

لان تعلم مهاره جديده مبهج جدا

ومبهج كمان لما تلقى ودانك بقت حساسه وبتلقط المشكله بسرعه ولما تلاقى ايديك اتدربت على التقاط العديد من المعلومات من مجرد لمسات بسيطه للعيان  بعد ما كنت فى الاول مبتعرفش تميز حاجه او تلقط ان فى اصوات مختلفه، طبيعيه ومش طبيعيه

وده اللى كانوا بيقلوللنا عليه ازاى تكون دكتور شاطر تعرف تكشف على العيان صح وتحصر احتمالات المرض فى مجموعه قليله قوى ان مكانش تشخص هو عنده ايه بالظبط كمان

ما اتعلمناش كل حاجه فى لحظه وكان فى حاجات كتير بتقع مننا فعلا

لكن مع التدريب والاجتهاد والتمييز قدرنا نوصل لمستوى حلو جدا اهلنا اننا نجتاز الاختبارات العمليه وننجح

عايز بصراحه اوصلك كام نقطه كدا ..

* الكلام لوحده مش كفايه فى التواصل، 

لازم تتعلم تلقط المشكله او الانذار او التلميح Non-verbal communication 
"بطن الشاعر" زى ما بيقولوا كده

لذه العلاقات اصلا فى اننا نوصل لدرجه من الانسجام تسمحلنا اننا نفهم بعض من غير كلام بزياده

انا مبقولش منتكلمش

لان ده غلط جدا وامور كتير عمرها ما بتوضح الا بالكلام 

و حتى فى الطب، التاريخ المرضى وشكوى العيان مهمين جدا

لكن بقولك متكتفيش بالكلام 

ودرب حواسك تلقط اللى بيتقال مع الكلام اللى هو اصلا اكتر بكتير قوى من الكلام نفسه

* الموضوع مش من يوم وليله .. دى مهاره تكتسب بالمجهود والتدريب

واللى بيسموها بالذكاء الاجتماعى

اى مهارتك فى التقاط كل ما هو" مع" الحديث ومهارتك كمان فى التفاعل مع الحتوى "الغير كلامى" والرد عليه بنفس اللغه كمان

* حتى فى العلاقه مع الله
فالله يتكلم بوضوح جدا

اوقات بطريقه مباشره قوى من خلال نص وصيه صريح مثلا ..

لكن فى اوقات كتير الله بيتكلم بطرق تانيه مش مباشره

ومحتاجه اذن متدربه وايدى ماهره لاتقاط وتمييز الصوت

فالله يتحدث من خلال الطبيعه ومن خلال الاحداث اليوميه

الله يتحدث على لسان الاشخاص وفى عمله فى حياه الاخرين

الفكره كلها تدريب واجتهاد ونعمه

نفس اللى بيعمله الطبيب من اجتهاد وتعب وفشل متكرر وتحس انه مستحيل اصلا لكن فى النهايه بيحصل وبتعرف تميز صوته قوى وتقول بالحقيقه كان هذا هو الله


متبقاش انسان بدائى ومحصور فى طريقه واحده لاستقبال وارسال المعلومات مع الله والناس
وسع مداركك واستغل كل حواسك ..
امن ان فيه طرق متميزه للتواصل بجانب الحديث المباشر
درب حواسك واتعلم واسال واعرف المقصود
اقرا واتعلم واعرف ومارس وانبسط بعمق جديد فى التواصل ..
مع الله ومع الناس

تحياتى